श्रीगोंदे - ‘सफरचंद बारीक असल्याने भाव व्यवस्थित लावून दे’ असे म्हटल्याचा राग आल्याने फळविक्रेत्याने ग्राहक दोन तरुणांना शिवीगाळ करून मारहाण केली. यातील एकाला नारळ फोडायच्या कोयत्याने डोक्यावर वार करून गंभीर जखमी केले.

या घटनेत प्रेमदास उबाळे (आढळगाव) यांच्या डोक्याला गंभीर दुखापत झाल्याने नगर येथील खासगी रुग्णालयात उपचार सुरू आहेत. याप्रकरणी शेखर दत्तात्रय गव्हाणे (रा. आढळगाव) यांच्या फिर्यादीवरून अतिक बागवान, अजर बागवान, जुबेर बागवान (सर्व श्रीगोंदे शहर) यांच्याविरुद्ध श्रीगोंदे पोलिस ठाण्यात गुन्हा दाखल केला. गुन्हा दाखल होताच पोलिसांनी तीन आरोपींना अटक करत न्यायालयात हजर केले असता न्यायालयाने तिघांना दोन दिवसांची पोलिस कोठडी दिली.

फिर्यादीनुसार, फिर्यादी आणि जखमी हे रविवारी सायंकाळी चार वाजण्याच्या सुमारास शहरातील बगाडे कॉर्नर परिसरातील फळविक्रेत्याकडे सफरचंदे घेण्यास गेले होते. भाव जास्त सांगितल्याने फिर्यादीने सफरचंद बारीक असल्याने भाव व्यवस्थित लावून दे, असे सांगितले,

पण त्याचा फळविक्रेत्याला राग आला. अजर बागवान याने फिर्यादीला शिवीगाळ करण्यास सुरवात केली. या वेळी प्रेमदास उबाळे यांनी मध्यस्थी करण्याचा प्रयत्न केला असता अतिक बागवान, जुबेर बागवान या दोघांनी फिर्यादी आणि जखमी यांना शिवीगाळ करीत मारहाण करण्यास सुरवात केली. त्याच वेळी अतिक बागवान याने हातातील नारळ फोडण्याच्या कोयत्याने प्रेमदास उबाळे यांच्या डोक्यावर वार केले. पुढील तपास पोलिस उपनिरीक्षक समीर अभंग करत आहेत.

अतिक्रमण काढण्याची मागणी बगाडे कॉर्नर परिसरात अनेक फळविक्रेत्यांचे अतिक्रमण आहे. काहींनी तर रस्त्यावर दुकाने मांडली आहेत. ही सगळी अतिक्रमणे काढण्यासाठी नगरपालिकेने कारवाई करण्याची मागणी नागरिकांनी केली.