Ahmednagar News: शिवीगाळ केल्याच्या कारणातून परप्रांतीय कामगाराच्या डोक्यात लाकडी दांडक्याने मारहाण करून ठार मारणाऱ्या आरोपींना एमआयडीसी पोलिसांनी ४८ तासांत बेड्या ठोकल्या. तपोवन रस्त्याने येत असताना भिस्तबाग महालाजवळ सापळा लावून आरोपींना अटक केली.

विश्वास नामदेव गायकवाड (वय २४, रा. श्रीस्टाईल चौक, एमआयडीसी, अहमदनगर), अक्षय ऊर्फ शंभो प्रकाश सकट (वय २३, रा. पिंपळगाव कौडा, ता. जि. अहमदनगर), राहुल अशोक धोत्रे (वय २६, रा. बजाजनगर, ता. जि. छत्रपती संभाजीनगर) अशी आरोपींची नावे आहेत.

एमआयडीसीमध्ये काम करणारा कामगार ओमप्रकाश रावचना महतो (वय ३५, मूळ रा. बक्सर, बिहार) याला ठार मारले होते. ही घटनाउघडकीस आल्यानंतर मृत व्यक्तीची पत्नी दुर्गादेवी ओमप्रकाश महतो यांनी दिलेल्या फिर्यादीवरून एमआयडीसी पोलिस ठाण्यात गुन्हा दाखल झाला होता.

गुन्ह्याचा तपास करीत असताना सहायक पोलिस निरीक्षक राजेंद्र सानप यांना माहिती मिळाली की, हा गुन्हा विश्वास गायकवाड व अक्षय सकट यांनी केला असून, दोघेही तपोवन रस्त्याने येत आहेत.(Latest Marathi News)

या माहितीच्या आधारे पोलिसांनी सापळा लावून दोन मुख्य आरोपींसह गुन्ह्यात मदत करणाऱ्या धोत्रे अशा तिघांना अटक केली. आरोपी दुचाकीवरून पळून जात असताना पोलिसांनी पाठलाग करून बेड्या ठोकल्या. आरोपींनी गुन्ह्याची कबुली दिली आहे.

सहायक पोलिस निरीक्षक राजेंद्र सानप, हेड कॉन्स्टेबल नंदकुमार सांगळे, नितीन उगलमुगले, साबिर शेख, विष्णू भागवत, राजू सुद्रिक, महेश बोरुडे, संतोष नेहुल, किशोर जाधव, नवनाथ दहिफळे, सचिन हरदास, गिरवले व मोबाईल सेलचे पोलिस कॉन्स्टेबल राहुल गुंडू यांच्या पथकाने कारवाई केली. (Latest Marathi News)