अहमदनगर: जिल्ह्यात पावसाने दडी मारली असली, तरी राष्ट्रीय आरोग्य अभियानांतर्गत कंत्राटी पदभरतीसाठी उमेदवारांच्या अर्जांचा अक्षरशः पाऊस पडला आहे. विशेषतः नर्सच्या पदासाठी आलेल्या अर्जांची संख्या मोठी आहे.

गेल्या अनेक वर्षांपासून भरतीच नसल्याने बेरोजगारांची संख्या वाढली होती. आता कंत्राटी भरती निघताच उमेदवारांची झुंबड उडाली आहे. तब्बल अकराशे अर्ज आले आहेत. एकंदरीत, लोकांना आरोग्यसेवा देण्यासाठी ही अहमहमिका लागली आहे.

यंदाच्या भरतीत हे चित्र असले तरी वरिष्ठ पदांच्या जागांकडे मात्र उमेदवार पाठ फिरवत असल्याचे वास्तव आहे. ग्रामीण भागात जाऊन तुटपुंज्या वेतनावर काम करण्यास एमबीबीएस डॉक्टर उत्सुक नसतात.

मागील काही भरतीत तसे निदर्शनास आले होते. राष्ट्रीय आरोग्य अभियानांतर्गत जिल्ह्यातील जिल्हा शल्य चिकित्सक व जिल्हा आरोग्य अधिकारी यांच्या अधिनस्थ ही कंत्राटी तत्त्वावर रिक्त पदे भरली जाणार आहेत.

जिल्हा रुग्णालय, उपजिल्हा रुग्णालय, ग्रामीण रुग्णालय व प्राथमिक आरोग्य केंद्रासाठी कंत्राटी पद्धती पदभरती केली जाणार आहे. अवघ्या २०९ जागांसाठी तब्बल हजाराहून अधिक अर्ज आले आहेत. मेडिकल ऑफिसर १८ (पुरुष),

तर महिलांसाठी २१ जागा आहेत. कर्जत, जामखेड, नगर, नेवासे, पारनेर आदी ठिकाणी काम करावे लागेल. स्टाफ नर्ससाठी सर्वाधिक ९७ जागा राखीव आहेत. कौन्सिलर, एक्स रे टेक्निशिअनच्याही जागा आहेत.

आज मुलाखती

राष्ट्रीय आरोग्य अभियानांतर्गत जिल्ह्यातील जिल्हा शल्यचिकित्सक व जिल्हा आरोग्य अधिकारी यांच्या अधिनस्थ ही कंत्राटी तत्त्वावरील रिक्त पदे भरली जाणार आहेत.

मुख्य कार्यकारी अधिकारी आशिष येरेकर, जिल्हा आरोग्य अधिकारी डॉ. संदीप सांगळे, जिल्हा शल्यचिकित्सक डॉ. संजय घोगरे, जिल्हा कार्यक्रम व्यवस्थापक डॉ. अमोल शिंदे हे संबंधित उमेदवारांच्या मुलाखती घेणार आहेत.