अहमदनगर: जिल्हा परिषदेत अधिकाऱ्यांसाठी विना परवानगी सुसज्ज दालने उभारण्याचे काम सार्वजनिक बांधकाम विभागाने हाती घेतली आहेत. एकीकडे ही परिस्थिती असताना दुसरीकडे माध्यमिक शिक्षण विभागाच्या गळणाऱ्या इमारतीची दुरुस्ती होत नसल्याने कर्मचारी हैराण झाले आहेत. महत्त्वाच्या फायलींपेक्षा अधिकाऱ्यांच्या सोयी करण्यात प्रशासन व्यस्त असल्याचे दिसून येत आहे.

जिल्हा परिषदेच्या आवारात नगर पंचायत समितीची जुनी इमारत आहे. या इमारतीत सध्या माध्यमिक शिक्षण विभागसह वेतनपथक कार्यालय, नगर तालुका महिला बालकल्याण कार्यालय आदी कार्यालये येथे आहेत. या इमारतीच्या दुरुस्तीकडे प्रशासनाचे दुर्लक्ष झाल्याचे दिसून येत आहे. गेल्या अनेक दिवसांपासून या इमारतीला गळती लागली आहे. त्याची डागडुजी करण्याकडे मात्र प्रशासनाचे दुर्लक्ष झालेले आहे. दरवर्षी पावसाळ्या या इमारतील वीजपुरवठा खंडीत ठेवण्यात येतो. पावसळ्यात या कार्लयातील फाईल व संगणक भिजू नये म्हणून प्लॅस्टिक कागदप अंथरून ठेवला जात आहे.

इमारतीला पावसळ्यात लागणाऱ्या गळीबाबत माध्यमिक शिक्षण विभागाने सार्वजनिक बांधकाम विभागाकडे २०२० मध्ये पत्रव्यवहार केला आहे. त्यानंतर २०२१ मध्येही पत्रव्यवहार केलेला आहे. या पाठपुरव्यानंतर मात्र बांधकाम विभागाने इमारत दुरुस्तीची पाहणी करून त्यासाठी लागणारा खर्चाचे अंदाजपत्रक तयार करण्यात आलेले आहे. मात्र प्रत्यक्षात कामकाजासाठी निधीची तरतूद केलेली नाही. मात्र जिल्हा परिषदेत नव्याने आलेल्या अधिकाऱ्यांच्या सूचनेवरून दालने सुसज्य केलेली आहेत. काही दालनांचे कामकाजही विनापरवानगी करण्यात आलेले आहे. काम पूर्ण झाल्यानंतर त्याचे अंदाजपत्रक तयार करून ते मंजूर करून घेतले जात आहे.

दुसरीकडे जिल्ह्यातील सुमारे एक हजार शाळा व दहा हजार शिक्षकांचे दप्तर असुरक्षित असतानाही त्याकडे प्रशासन दुर्लक्ष करीत असल्याने आश्‍चर्य व्यक्त करण्यात येत आहे. सध्या कार्यालयाचा कारभार छतावर प्लॅस्टिक कागद टाकून सुरू आहे.

या दालनांचे झाले नूतनीकरण

• ग्रामीण पाणीपुरवठा

• उपमुख्य लेखा व वित्त अधिकारी

• प्राथमिक शिक्षण विभागात स्वतंत्र दोन केबिन

• रोजगार हमी योजना अधिकारी दालन

• तीन पदाधिकाऱ्यांची दालने

जिल्हा परिषदेच्या आवारात असलेल्या जुन्या पंचायत समितीच्या इमारतीची डागडुजी होण्यासाठी आगामी वर्षात नियोजन करण्यात येईल.

-प्रवीण जोशी, प्रभारी कार्यकारी अभियंता, सार्वजनिक बांधकाम, दक्षिण.

जुन्या पंचायत समितीच्या इमारतीची डागडुजीसाठी संबंधित विभागाने पत्रव्यवहार केलेला आहे. त्यानंतर या इमारतीची पाहणी करून दुरुस्तीसाठी दोन वर्षांपूर्वी सुमारे १२ लाखांचे खर्चाचे अंदाजपत्रक तयार करण्यात आलेले आहे.

-शिवाजी राऊत, सहायक अभियंता, नगर तालुका