अहमदनगर : दीपावली सुरू झाल्याने घरोघरी फटाके वाजवून आनंदोत्सव साजरा करण्यात येत आहे. मात्र, शहरातील एक भाग असाही आहे, जेथे बाराही महिने ‘फटाके’ वाजतात. मात्र, ते शोभेच्या दारूकामाचे नव्हे, तर उच्चदाबवाहिनी वीज तारांच्या घर्षणाचे. पावसाळ्यात तर या तारांतून ठिणग्या पडतात. या ‘फटाक्यां’ची आतषबाजी त्या भागातील व्यावसायिक व ग्राहक जीव मुठीत घेऊन भेदरलेल्या नजरेने पाहतात.

हे ठिकाण आहे शहरातील सर्वात जुन्या बाजारपेठेतील. गंज बाजार व सोनार गल्लीतील. या भागात महावितरणच्या विद्युततारा उंच इमारतींना बिलगून आहेत. त्यातच काही तारा तर हात पोचेल अशा अंतरावर झोका घेत आहेत. हा विद्युत तारांचा झोका एखाद्याचा जीवही घेऊ शकतो, याचे महावितरण प्रशासनाला सोयरसुतक नाही.

यासंदर्भात सुवर्ण व्यावसायिकांनी आठ-दहा वेळा महावितरण प्रशासनाकडे निवेदने दिली. महावितरणचे कर्मचारी येतात, पाहणी करतात आणि निघून जातात. विद्युत खांबांची अवस्था कोळ्याच्या जाळ्यासारखी झाली आहे. वाऱ्याच्या तीव्र झुळुक आली, की या तारा एकमेकींना घासतात. त्यातून ठिणग्या उडतात. पावसाळ्यात या भागात पाणी साचते. त्यात विजेच्या ठिणग्या पडतात. हे विद्युत फटाके जीवघेणे ठरण्याची शक्यता आहे. त्यामुळे पाऊस सुरू असताना सुवर्ण व्यावसायिक ग्राहकांना दुकानातच थांबण्याचा सल्ला दिला जातो. महावितरण एखाद्याचा जीव जाण्याची वाट पाहत आहेत का, अशी तीव्र प्रतिक्रिया सुवर्ण व्यावसायिक विचारत आहेत.

"सोनार गल्लीतील विद्युत तारांसंदर्भात महावितरण प्रशासनाला आठ-दङा वेळा निवेदने दिली आहेत. मात्र, त्यांच्या अधिकाऱ्यांना इकडे पाहायला वेळ नाही. महावितरणची कामे खासगी ठेकेदारांना देऊन ते मोकळे होत आहेत. अधिकारी एखाद्या मोठ्या दुर्घटनेची वाट पाहत आहेत काय? वीजबिल भरले नाही तर सक्तीने वसुली करण्यासाठी येणारे महावितरण कर्मचारी समस्या सोडविण्यासाठी का येत नाहीत?"

- संतोष वर्मा, जिल्हाध्यक्ष, सराफ सुवर्णकार संघटना