200 years Old Vitthal Statue: दुसरे बाजीराव पेशव्यांचे दिवाण असलेल्या सरदार त्रिंबक डेंगळे यांच्या निमगावजाळी (ता. संगमनेर) येथील ऐतिहासिक वाड्यात त्यावेळी ते देवपूजेसाठी वापरात असलेल्या दोनशे वर्षे जुनी पाषाणाची विठ्ठल मूर्ती आढळली आहे.‘यंदा कार्तिकीपूर्वी साक्षात विठ्ठल भेटला’ अशी प्रतिक्रिया इतिहासाचे अभ्यासक सुमित डेंगळे यांनी यावेळी दिली.

निमगावजाळी येथील सरदार त्रिंबक डेंगळे यांचा वाडा पाहण्यासाठी काही दिवसांपूर्वी काही माणसं आली होती. सुमित डेंगळे व डॉ. विजय वादक हे नेहमीप्रमाणे आलेल्या माणसांना वाडा व त्यांचे ऐतिहासिक महत्त्व सांगत होते. यावेळी प्रवेशद्वार, तटबंदी, आडमागचा चौक आदी वाड्यातील जुन्या वास्तू दाखवण्यात आल्या.

यावेळी नेहमी बंद असलेल्या कोनाडा डॉ. वदक यांनी उघडला असता त्यामध्ये सागाचे सुंदर महिरपी देवघर व दोन्ही बाजूला दोन कप्पे काढले असल्याचे लक्षात आले. त्यामुळे कुतहलापोटी त्यांनी हात आतमध्ये घातला असता काळ्या पाषाणातील आखीव रेखीव, हातभर उंच व एक हात तुटलेली पांडुरंगाची मूर्ती बाहेर काढली, हे पाहून सारेच अवाक् झाले.(Latest Marathi News)

डेंगळे कुटुंबीयांची विठ्ठलभक्तीची परंपरा

सरदार त्रिंबकजी डेंगळे हे विठ्ठलभक्त असल्याने आळंदीला माउलींच्या दर्शनाला नित्यनेमाने जात असत. आळंदी देवस्थानला स्वतःच्या खासगीतून इनाम जमीनही त्यांनी करून दिली होती. तुकारामांचे अभंग त्यांना विशेष आवडीचे होते. पंढरपूर वाऱ्याही ते करीत. त्यांचे वंशजही विठ्ठलभक्त, वारकरी संप्रदायाचे.

त्रिंबकजी डेंगळे यांचे नातू दादासाहेब यांनी १८९१ साली गंगागिरी महाराजांचा अखंड हरिनाम सप्ताह निमगावजाळीत घडवून आणला होता. त्यामुळे मूर्तीरुपी सापडलेला हा ऐतिहासिक ठेवा जतन करण्याची मोठी जबाबदारी आता पार पाडावी लागणार आहे, असे इतिहासाचे अभ्यासक सुमित डेंगळे यांनी सांगितले. (Latest Marathi News)