कोल्हार - पाच मिनिटांत पैसे दुप्पट करून देण्याचे आमिष दाखवून फसवणूक करणाऱ्या टोळीला लोणी पोलिसांनी गजाआड केले आहे. त्यांच्याकडून पाच लाख रुपयांची रोकड, गुन्ह्यात वापरलेल्या दोन दुचाकी व मोबाईल संच हस्तगत केले आहेत.

जितेंद्र ममता साठे (रा. वासुंदे ता. पारनेर) त्याचे साथीदार अरुण सुरेश शिंदे (रा. वरवंडी, ता. संगमनेर), अन्वर अब्दुलखा पठाण (रा. केशवनगर मुंढवा, पुणे) अशी आरोपींची नावे आहेत. बाबासाहेब वसंत सूर्यवंशी (रा. बळेगाव, ता. वैजापूर ) यांनी याप्रकरणी फिर्याद दिली.

याबाबत लोणी पोलिस ठाण्याचे सहायक निरीक्षक युवराज आठरे यांनी सांगितले, की आरोपी जितेंद्र साठे याने शिंदे असे खोटे नाव सांगून तक्रारदार सूर्यवंशी यांना पाच मिनिटात पैसे दुप्पट करून देतो, असे आमिष दाखवले. त्यासाठी त्यांना लोणी येथील प्रिन्स कॉर्नर चौकात बोलावून घेतले.

त्यांच्याकडून साडेनऊ लाख रुपये घेऊन हातचलाखीने आरोपींनी रद्दी पेपर असलेली बॅग देऊन त्यांची फसवणूक केली. मुख्य आरोपी जितेंद्र साठे हा सराईत गुन्हेगार असून, त्याच्यावर आळे फाटा नारायणगाव पोलिसांत गुन्हे दाखल आहेत. तो ठिकाणे बदलून बरेच दिवस पोलिसांना गुंगारा देत होता. दरम्यान त्याचा ठावठिकाणा लावण्यात यश आले. साठे याला सविंदणे (ता. शिरूर) येथे रात्रीच्या वेळी ताब्यात घेतले.

पॉलिसी खाक्या त्याने इतर साथीदारांची माहिती दिली. पोलिसांनी तिघांनाही जेरबंद केले. पोलिस अधीक्षक राकेश कोला, अपर पोलिस अधीक्षक स्वाती भोर, शिर्डीचे उपविभागीय अधिकारी संदीप मिटके यांच्या मार्गदर्शनाखाली युवराज आठरे, उपनिरीक्षक योगेश शिंदे, जोसेफ साळवी आदींनी ही कारवाई केली.