Ahmednagar News: महिला-मुलींच्या संरक्षणासाठी पुढाकार घेत पोलीस निरीक्षक चंद्रशेखर यादव यांनी नगरच्या भाऊसाहेब फिरोदीया हायस्कुलमध्ये जनजागृती चर्चासत्र घेऊन ‘तिची छेड काढली जातेय का?’, या विषयावर चर्चासत्र घेतले व माहिती पत्रकांचे विद्यार्थ्यांना वाटप केले. विद्यार्थिनींनी यादव यांना तक्रारी सांगितल्या.

शाळा-महाविद्यालय परिसरात मुलींची छेड काढली जाऊ नये आणि काढलीच तर पुढे काय करावे? कशी मदत मिळवावी? यासाठी कोतवाली पोलीस ठाण्याचे पोलिस निरीक्षक चंद्रशेखर यादव यांनी मोहीम सुरू केली आहे. विद्यार्थ्यांना कायद्याचे धडे दिले. लहान मुलांचा लैंगिक अत्याचार प्रतिबंधक कायदा काय आहे? याबाबत सविस्तर माहिती दिली.

तसेच मुलांनी कोणत्याही प्रकारे कोणत्याही मुलीची छेड काढू नये आणि असा काही प्रकार झाल्यास मुलींनी या प्रकाराला कसे सामोरे जावे? तक्रार कशी करावी? आपले नाव कसे गोपनीय राहील याबाबत सविस्तर माहिती देण्यात आली. यावेळी पोलिसांनी तयार केलेले ऑनलाईन फसवणुकीबाबतचे पत्रकही वाटप करण्यात आले. यावेळी भाऊसाहेब फिरोदिया विद्यालयाचे उपप्रायार्य रावसाहेब बाबर, प्राध्यापिका आशा सातपुते उपस्थित होते.

मुलींकडून तक्रारींचा पाढा

कुणी काही त्रास देत असेल तर सांगा कारवाई करू, असे पोलिस निरीक्षक यादव यांनी आवाहन केल्यानंतर मुलींनी अनेक तक्रारी केल्या. घराच्या आजूबाजूचे, शाळाबाह्य मुले, विद्यालयातील काही मुले तसेच काही स्कूल व्हॅनचे चालक आदींबाबत तक्रारी प्राप्त झाल्या. संबंधितांवर कारवाई होणार असल्याचे यादव यांनी सांगितले. (Latest Marathi News)