Ex MLA Shivajirao Kardile:माजी मंत्री शिवाजी कर्डिले आणि त्यांचा मुलगा अक्षय यांच्याविरुद्ध प्रथम वर्ग न्यायालयाने खासगी फिर्याद दाखल करून तपास करण्याचा आदेश दिला होता. प्रधान जिल्हा व सत्र न्यायाधीश सुधाकर यार्लगड्डा यांनी प्रथम वर्ग न्यायालयाचा आदेश रद्द केला आहे.

बुऱ्हाणनगर (ता. नगर) येथील रहिवाशी ॲड. अभिषेक भगत यांनी नवरात्र उत्सवाच्या वेळेस ता. २२ सप्टेंबर २०२२ रोजी धमकावण्यात आले होते. याप्रकरणी त्यांनी भिंगार कॅम्प पोलिस ठाण्यात तक्रार दिली होती. या तक्रारीची पोलिसांनी दखल घेतली नाही. ॲड. भगत हे ता. २३ सप्टेंबर २०२२ रोजी आष्टी-अहमदनगर रेल्वेच्या उद्घाटन समारंभाला आष्टी येथे गेले होते. त्यावेळेसही धमकावण्यात आले होते.

त्यानंतर ता.२४ फेब्रुवारी २०२३ रोजी रात्री नऊ वाजण्याच्या सुमारास अनोळखी व्यक्तीने फोन करून कर्डिले यांच्या वतीने धमकावले होते. ॲड. भगत यांनी या घटनांच्या आधारे अहमदनगर येथील प्रथम वर्ग न्यायालयात खासगी फिर्याद दाखल केली होती. अतिरिक्त मुख्य न्यायदंडाधिकारी क्रमांक ८ यांनी कोतवाली पोलिसांना फौजदारी न्यायप्रक्रिया संहितेच्या १५६ (३) कलमातील तरतुदीअन्वये पोलिसांना गुन्हा दाखल करून तपास करण्याचा आदेश दिला होता.

कर्डिले पिता-पुत्रांनी प्रथम वर्ग न्यायालयाच्या आदेशावर जिल्हा सत्र न्यायालयात पुनर्विलोकन अर्ज दाखल केला होता. न्यायालयाने प्राथमिक सुनावणी घेऊन प्रथम वर्ग न्यायालयाच्या कार्यवाहीला स्थगिती दिली होती. प्रधान जिल्हा सत्र न्यायाधीश यार्लगड्डा यांच्यासमोर या पुनर्विलोकन अर्जाची सुनावणी झाली. कर्डिले पिता-पुत्रांच्या वतीने ॲड. भूषण बऱ्हाटे यांनी युक्तिवाद केला. (Latest Marathi News)