बोधेगाव - पर्यावरण संरक्षणासाठी वृक्षलागवडीचा चंग बांधलेल्या संजय आंधळे यांनी झाड फाउंडेशनच्या माध्यमातून चालू वर्षी गोळेगाव (ता. शेवगाव) येथे महाकाय वटवृक्षाचे रोपण केले आहे.तालुक्यातील जनतेला वृक्षांचे महत्त्व, त्यांची जीवनात असलेली किंमत कळावी आणि प्रत्येकाच्या मनात वृक्ष लावण्याचा विचार निर्माण व्हावा,

वृक्षारोपण ही सामाजिक चळवळ बनावी, यासाठी गेल्या दोन वर्षांपासून संजय आंधळे यांनी झाड फाउंडेशनच्या माध्यमातून २०२१ मध्ये तीन हजार, तर २०२२ मध्ये चार हजार आणि २०२३ मध्ये पाच हजार झाडे लावण्याचे उद्दिष्ट डोळ्यासमोर ठेवले. चालू वर्षी पावसाचे अत्यल्प प्रमाण असल्याने आतापर्यंत तीन हजार वृक्षांची लागवड करण्यात आली आहे.

वेगवेगळ्या वृक्षांचा शोध घेण्यासाठी आंधळे संभाजीनगरला जात होते. त्यांना पैठण तालुक्यातील कातपूर फाट्यानजीक २५ ते ३० वर्षांपूर्वीचे ३० फूट उंच आणि १८ फूट गोलाई असलेला वटवृक्ष रस्त्याच्या कामात येत होता. त्यामुळे त्याला काढण्यात येणार असल्याचे निदर्शनास आले. त्याच क्षणी त्यांनी अभियंता, कॉन्ट्रॅक्टर यांच्याशी संपर्क केला. कंटेनर घेऊन जाऊन आंधळे यांनी हा वृक्ष मुळासकट आणून गोळेगाव येथील संत ज्ञानेश्वर मंदिर परिसरातील (कै.) लोकनेते गोपीनाथ मुंडे स्मारकासमोर त्याचे प्रत्यारोपण केले.

आज सरकार ‘झाडे लावा झाडे जगवा’च्या नावाखाली कोट्यवधी रुपये खर्च करून विविध उपक्रम राबवत आहे. मात्र, विकासाच्या नावाखाली २५ ते ३० वर्षे जुन्या झाडांवर कुऱ्हाड घातली जात आहे. पर्यावरणाला प्राधान्य देत विकास साधला तरच मनुष्यप्राणी मुक्त श्वास घेणार आहे.

संजय आंधळे, अध्यक्ष, झाड फाउंडेशन, गोळेगाव