अहमदनगर : सक्कर चौक, अक्षता गार्डन, कोठी चौक व सीएसआरडी कॉलेज या रस्त्यांदरम्यान पावसाळ्यामध्ये तीन ते चार फुटांपर्यंत रस्त्यावर पावसाचे पाणी साचते. त्यामुळे वाहतूक कोंडीचा प्रश्न निर्माण होतो. याचबरोबर परिसरातील नागरिकांच्या आरोग्याचाही प्रश्न निर्माण होतो. तात्पुरत्या स्वरूपात या चार ते पाच ठिकाणचे पाणी वाहून जाण्यासाठी योग्य त्या उपाययोजना तातडीने कराव्यात, अशा सूचना आमदार संग्राम जगताप यांनी महापालिकेच्या अधिकाऱ्यांना दिल्या.

उड्डाणपुलाचे काम सुरू असलेल्या रस्त्यावरील साइड गटार दुरुस्तीबाबत आमदार जगताप यांनी राष्ट्रीय महामार्ग कार्यालयाला पत्रव्यवहार केला होता. त्यानुसार पाहणी करून महापालिका कार्यालयात बैठकीचे आयोजन करण्यात आले होते. यावेळी आयुक्त शंकर गोरे, राष्ट्रीय महामार्गाचे अधिकारी दिवाण, स्थायी समितीचे सभापती कुमारसिंह वाकळे, उपायुक्त यशवंत डांगे, उपायुक्त श्रीनिवास कुरे, शहर अभियंता सुरेश इथापे, उद्योजक अफजल शेख, जलअभियंता परिमल निकम आदी उपस्थित होते.

जगताप म्हणाले, की हा प्रश्न कायमस्वरूपी मार्गी लावण्यासाठी महापालिका व राष्ट्रीय महामार्ग कार्यालयाने प्लॅन तयार करावा, जेणे करून पुढील पावसाळ्यात हा प्रश्न कायमस्वरूपी मार्गी लागेल. आता तात्पुरत्या स्वरूपात रस्त्यावर पाणी साचणार नाही, यासाठी उपाययोजना करून तातडीने काम सुरू करावे, नगरोत्थान योजनेतील बालिकाश्रम रोड, मुकुंदनगर, सक्कर चौक ते कोठी रस्ता, महात्मा फुले चौक परिसरातील रस्ता या सर्व रस्त्यावरील साइड गटारी स्वच्छ करण्याचे काम तातडीने सुरू करा. एका बाजूने टँकरद्वारे पाणी टाकावे, ते पाणी दुसऱ्या बाजूला निघाल्यानंतरच ठेकेदाराचे बिल द्या.