नगर तालुका : शहरातील माळीवाडा बसस्थानक परिसरातील छत्रपती शिवाजी महाराजांच्या अश्वारूढ पुतळ्याचे सुशोभिकरण करून लोकार्पण करताना अत्यानंद होत आहे. यापुढे शहरातील या महत्वाच्या चौकास छत्रपती शिवाजी महाराज चौक असे संबोधण्यात येईल. लवकरच शासन दरबारी पाठपुरावा करून धर्मवीर संभाजी महाराज, महात्मा ज्योतिबा फुले व भारतरत्न डॉ. बाबासाहेब आंबेडकरांचा पूर्णाकृती पुतळा शहरात उभारणार आहे, असे प्रतिपादन आमदार संग्राम जगताप यांनी केले.

छत्रपती शिवाजी महाराज पुतळ्याच्या लोकार्पण कार्यक्रमा समारंभप्रसंगी ते बोलत होते. रविवार (ता. ६)ला सकाळपासून आयुर्वेद चौक, माळीवाडा, जिल्हा परिषद रस्ता, नगर-पुणे राज्य महामार्ग, वाडिया पार्क परिसर भगवेमय झाले होते.

सायंकाळी २१ ब्रम्हवृंदांच्या मंत्रोच्चारात छत्रपती शिवाजी महाराजांच्या पुतळ्यास अभिषेक करण्यात आला. त्यानंतर आमदार संग्राम जगताप यांच्या हस्ते पूजन करून शिवआरती करण्यात आली. या वेळी उपमहापौर गणेश भोसले, सभापती अविनाश घुले, युवा नेते अक्षय कर्डिले यांच्यासह शहरातील विविध क्षेत्रातील मान्यवर उपस्थित होते.

छत्रपती शिवाजी महाराजांच्या लोकार्पण सोहळ्यासाठी शहरासह जिल्ह्यातून तरुणाई मोठ्या प्रमाणात माळीवाडा बसस्थानक परिसरात दाखल झाली होती. शहरातील तरुणांनी भगवे झेंडे लावून दुचाकी रॅलींचे शहरातून आयोजन करण्यात आले होते. त्यामुळे शहरात शिवशाही अवतरल्याचे भासत होते.

माळीवाड्यापासून इंम्पिरीयल हॉटेलपर्यंत, जिल्हा बॅंकेपासून पुणे बसस्थानक चौकापर्यंत उभे राहण्यासही जागा नव्हती. यात युवतींनीही या कार्यक्रमास मोठी गर्दी केली होती.