राहुरी (जि. अहमदनगर) : तालुक्यातील कुक्कडवेढे येथे आज (बुधवारी) शेतातील विहिरीत एका विवाहित तरुणीचा मृतदेह तरंगताना आढळला. मृत महिलेच्या माहेरच्या नातेवाइकांनी घातपात झाल्याचा संशय व्यक्त केला. त्यावरून सासरच्या तीन जणांना पोलिसांनी ताब्यात घेतले. (body of the married woman was found in the well)

छाया शिवाजी भुसारे (वय २८, रा. कुक्कडवेढे) असे मृत विवाहितेचे नाव आहे. त्यांच्या शेतातील विहिरीत मृतदेह आढळला. घटनेची माहिती समजताच पोलिस निरीक्षक राजेंद्र इंगळे यांच्यासह पोलिसांचा मोठा फौजफाटा घटनास्थळी दाखल झाला. स्थानिक लोकांच्या मदतीने मृतदेह विहिरीतून बाहेर काढला.

बऱ्याच महिन्यांपासून, माहेराहून पैसे आणण्यासाठी सासरी शारीरिक व मानसिक छळ होत होता. सासरच्या त्रासाबाबत तिने माहेरच्या लोकांना सांगितले होते. शिवाजी आसाराम भुसारे (पती), आसाराम मारुती भुसारे (सासरे), यमुनाबाई आसाराम भुसारे (सासू), गीताबाई रमेश पंडित (नणंद) यांनी घातपात केल्याचा संशय माहेरच्यांनी व्यक्त केला. पोलिसांनी शिवाजी आसाराम भुसारे (पती), आसाराम मारुती भुसारे (सासरे), यमुनाबाई आसाराम भुसारे (सासू) या तिघांना तत्काळ ताब्यात घेतले आहे.