राहुरी : वरखेड येथे सासरी नांदत असताना दुकान टाकण्यासाठी माहेराहून दोन लाख रुपये आणावेत, या मागणीसाठी विवाहित तरुणीचा शारीरिक व मानसिक छळ करून तिला घरातून बाहेर हाकलून दिल्याप्रकरणी सासरच्या सहा जणांविरुद्ध राहुरी पोलिस ठाण्यात गुन्हा नोंदविण्यात आला आहे. विलास विठ्ठल डुक्रे, विठ्ठल शंकर डुक्रे, विमल विठ्ठल डुक्रे, किसन शंकर डुक्रे, कलाबाई किसन डुक्रे (सर्व जण रा. वरखेड, ता. नेवासे), मंगल गोरख गायकवाड (रा. लोणी, ता. राहाता) अशी आरोपींची नावे आहेत.

पूजा विलास डुक्रे (वय २७, हल्ली रा. प्रसादनगर, राहुरी फॅक्टरी) यांनी दिलेल्या फिर्यादीत म्हटले आहे, की कृषी सेवा केंद्र दुकान टाकण्यासाठी माहेरून दोन लाख रुपये आणावेत. या मागणीसाठी पतीसह सासऱ्याच्या मंडळींनी वेळोवेळी शिवीगाळ, मारहाण करून शारीरिक व मानसिक छळ केला. घराबाहेर हाकलून दिले. पुढील तपास पोलिस हवालदार ज्ञानदेव गर्जे करीत आहेत.