अहमदनगर : महानगरपालिकेचे मुख्य लेखाधिकारी प्रवीण मानकर यास ठेकेदाराचे बिल देण्याच्या बदल्यात 20 हजारांची लाच मागितल्यावरून नगरच्या लाचलुचपत प्रतिबंधक विभागाने अटक केली होती. मानकर यांच्या घराची झडती घेतली असता 11 लाख 50 हजारांची रोख रक्कम, 540 ग्रॅम सोन्याचे दागिने, दीड किलो चांदी आणि तीन फ्लॅटची कागदपत्रे अशी कोट्यावधी रुपयांची संपत्ती आढळून आली आहे.

प्रवीण मानकर याला लाचेची मागणी केल्याबद्दल अटक करण्यात आली होती. मानकर यांचे कुटुंबीय पुणे येथील फ्लॅट नंबर 102, फ्यांटसी, उत्तम टाऊन स्केप, विश्रांतवाडी येथे राहत आहेत. मानकर यास अटक केल्यानंतर लाचलुचपत प्रतिबंधक विभागाच्या एका पथकाने त्याच्या पुणे येथील घराची झडती घेतली. त्याच्या पत्नीकडे या रोख रक्कम, दागिने आणि फ्लॅटच्या कागदपत्रांबद्दल उत्पन्नाचा स्त्रोत विचारला असता, समाधानकारक उत्तरे देऊ शकली नाहीत. ही रोख रक्कम, दागिने आणि फ्लॅटची कागदपत्रे जप्त करण्यात आले आहेत. मानकर यास न्यायालयासमोर हजर केले असता एक दिवसाची पोलिस कोठडी मंजूर करण्यात आली आहे. पोलिस निरीक्षक पुष्पा निमसे या गुन्ह्याचा तपास करीत आहेत.