संगमनेर - माहिती आणि तंत्रज्ञानाच्या क्षेत्रात ग्रामीण भागातील मुलांचा टक्का कमी पडत असल्याचे शल्य कायम होते. स्वतः ग्रामीण भागातील असूनही या क्षेत्रात बऱ्यापैकी जम बसल्यावर, आपल्यासारख्या अनेकांच्या स्वप्नाला मूर्तरुप देण्यासाठी त्यांनी कार्यक्षेत्र म्हणून आपली मातृभुमी निवडली. अमेरिकेत आयटी कंपनी चालवणारे रावसाहेब घुगे यांनी अमेरिका सोडून आपल्या मायभूमित पारेगाव खुर्दच्या माळरानावर आयटी कंपनी उभारली आहे.

जागतिकीकरणातून माहिती तंत्रज्ञानाची कवाडे उघडल्याने व्यावसायिक शिक्षणातून जागतीक पातळीवर काम करण्याची संधी प्राप्त झाली. महानगरांमध्येही या क्षेत्रातील शिक्षणाचे विविध पर्याय निर्माण झाले, मात्र यात ग्रामीण भाग मागेच राहिला. माहिती व तंत्रज्ञानाच्या क्षेत्रात भविष्य घडविण्याचे स्वप्नं पाहून शेतकरी, कष्टकरी व सामान्य कुटुंबातील अनेक विद्यार्थ्यांनी या क्षेत्रात प्रवेश केला. मात्र महानगरांच्या तुलनेत शैक्षणिक दर्जा व परदेशी नोकरी करण्यासाठी कुटुबांचा अडथळा, यामुळे अनेकांचा स्वप्नभंग झाला. रावसाहेब घुगे यांनी शिक्षण पूर्ण करुन अमेरिकेतील कंपनीत काही वर्ष काम केले. तेथेच स्वतःची बिझनेस ॲप्लिकेशन ॲण्ड प्लॅटफॉर्म ही कंपनी सुरू करुन अल्पावधीतच चांगला जम बसवला. ही संधी आपल्या भागातील मुलांना उपलब्ध करुन देण्यासाठी त्यांनी वॉशिंग्टनहून थेट पारेगाव खुर्द गाठले.

मित्रांच्या सल्ल्यातून गावाच्या माळरानावर जानेवारीत भुमिपूजन झालेल्या या कंपनीचे भव्य कार्यालय उभे राहिले. जिल्ह्यातील पहिली आयटी कंपनीचा प्रारंभ रविवारी (ता. ३१) रोजी होत आहे.

माहिती आणि तंत्रज्ञानाच्या क्षेत्रात मोठ्या संधी उपलब्ध असलेल्या अफाट क्षेत्रात शेतकरी व ग्रामीण भागातील मुले मागेच आहेत. पारेगावच्या या कंपनीत केवळ शेतकऱ्यांच्या मुलांना प्राधान्य देऊन, प्रशिक्षणासह कंपनीत नोकरी देणार आहे.

- रावसाहेब घुगे, संस्थापक, आयटी कंपनी