नगर ः अहमदनगर जिल्ह्यातील आणखी एक रुग्ण बरा होऊन घरी परतला आहे. संगमनेर येथील ५२ वर्षीय रुग्णाने कोरोनावर मात केली.

हॉस्पिटलमधून डिस्चार्ज दिल्याने ते घरी परतले आहेत. कोरोनातून बरे झालेल्या रुग्णांची संख्या आता २२० झाली आहे. हा आकडा मोठा आहे. जिल्हा आरोग्य यंत्रणेची माहिती आहे. एकीकडे ही स्थिती असताना पुन्हा पुणे आणि मुंबईकरांमुळे बाधित होण्याचा सिलसिला सुरूच आहे.

जिल्ह्याच्या आज तीन रूग्ण वाढले. त्यात कर्जत तालुका, पारनेर आणि संगमनेर तालुक्याचा समावेश आहे.

पुण्याहून कर्जत तालुक्यातील राशीन येथे आलेल्या 60 वर्षीय व्यक्तीला कोरोनाची लागण झाल्याचे अहवातून समोर आले आहे. कांदिवली (मुंबई) येथून प्रवास करून पारनेर तालुक्यातील भाळवणी येथे आलेल्या 68 वर्षीय व्यक्ती कोरोना बाधित निघाला.

संगमनेर तालुक्यातील राजापूर येथील 34 वर्षीय व्यक्ती कोरोना पॉझिटिव्ह सापडली. आजाराची लक्षणे जाणवू लागल्याने उपचारासाठी दाखल झाला होता.

जिल्हयातील अॅक्टिव केसेस ३८ आहेत. एकूण रुग्णसंख्या २६९ झाली आहे. एकूण स्त्राव तपासणी ३५९१ झाले आहेत. मागील महिन्यापासून दररोज कोरोनाचे रूग्ण सापडत आहेत. परगावहून येणाऱ्यांमुळे ही बाधा होत असल्याचे समोर आलेले असतानाही प्रशासनाकडून म्हणावी तशी काळजी घेतली जात नाही.