अकोले : अगस्तीमध्ये राजकारण आणले नाही म्हणूनच २८ वर्षे अगस्ती अविरत सुरू आहे. यापुढेही अगस्ती ऊर्जीतावस्थेत आणण्यासाठी सर्वपक्षीय मदत घेऊन यावर्षी मशनरीक्षमते इतके गाळप काढून नफ्यात वाढ करण्याचा प्रयत्न आहे. अगस्ती स्वयंपूर्ण करण्याचे धोरण आहे, असे उद्गार माजी मंत्री व अगस्ती संस्थापक अध्यक्ष मधुकर पिचड यांनी काढले.

२८ व्या ऊस गळीत हंगामाचा प्रारंभ संस्थापक अध्यक्ष माजी मंत्री पिचड यांच्या अध्यक्षतेखाली संपन्न झाला. यावेळी तालुक्याचे आमदार डॉ. किरण लहामटे, योगी केशव बाबा चौधरी, कारखान्याचे उपाध्यक्ष सीताराम गायकर, माजी सभापती विठ्ठल चासकर, राष्ट्रवादी तालुका अध्यक्ष भानुदास तिकांडे, जे. डी. आंबरे, विजयराव वाकचौरे, विकास शेटे, सीताराम देशमुख, गिरजाजी जाधव, सुधाकर देशमुख, रमेश देशमुख, आरिफ तांबोळी, प्रकाश नवले, भाऊसाहेब गोडसे, परबत नाईकवाडे, प्रदीप हासे, बाळासाहेब भोर उपस्थित होते.

या वेळी बोलताना पिचड म्हणाले की, अतिशय प्रतिकूल परिस्थितीत कारखाना सुरू आहे. योग्य ते नियोजन करून उसाला चांगला भाव देण्याचा आमचा मानस आहे. या वेळी सभासदांना २५ रूपये दराने दिवाळीला साखर देण्यात येणार आहे. कार्यक्षेत्रात मोठ्या प्रमाणात ऊस लागवड करून कारखाना कर्जमुक्त करण्यात प्रधान्य राहील. कारखाना स्थापन करताना मी संकल्प केला होता की ह्या कारखान्यात कोणतेही पक्षीय राजकारण करणार नाही. सर्वांना बरोबर घेऊन हा कारखाना चालणार आहे. त्याप्रमाणे शेतकऱ्यांच्या विकास हे उद्दिष्ट डोळ्यासमोर ठेवून २८वर्षे अगस्ती सुरू आहे. इथेनॉल प्रकल्प बायप्रॉडक्ट तयार करून अगस्ती आर्थिक घडी बसवली जाईल.

गायकर म्हणाले की, पहिले पेमेंट 2 हजार 250 रूपयांनी केले आहे. मात्र, एफआरपी रक्कम देणे आहे. दिवाळीपूर्वी सदर रक्कम दिली जाईल. साखरेचे दर वाढत असल्याने आशा आहे. तोटा कमी होण्यासाठी इथेनॉल प्रकल्प राबिवला आहे. यातून निश्चित तोटा कमी होईल. इथेनॉलमधून किमान १५ ते २० कोटी निव्वळ उत्पन्न मिळेल.

आमदार डॉ. किरण लहामटे यांनी उपमुख्यमंत्री अजित पवार यांचेकडे अगस्तीबाबत बैठक झाली आहे. त्यात गायकर यांनी भूमिका मांडली. अगस्ती काटकसरीने चालविणे आवश्यक आहे.