अहमदनगर ः श्रीरामपूर तालुक्यातील बेलापूरचे उद्योजक गौतम हिरण यांच्या अपहरणानंतर झालेल्या हत्येमुळे महाराष्ट्राचे राजकारण ढवळून निघाले आहे. विरोधी पक्षनेते देवेंद्र फडणवीस यांनी पोलिस प्रशासन आणि राज्य सरकारवर सडकून टीका केली आहे. आमदार राधाकृष्ण विखे पाटील यांनीही याबाबत आवाज उठवला होता.

हिरण यांची हत्या हे पोलिस प्रशासनाचे अपयश असल्याची टीका विखे पाटलांनी केली होती. काल रात्री या प्रकरणात दोघाजणांना ताब्यात घेतले आहे. पोलिस अधीक्षक मनोज पाटील हे या प्रकरणात जातीने लक्ष घालून आहेत.

हेही वाचा - ताई तुम्ही संधीचा फायदा उचलला, रोहित पवारांचे अमृता फडणवीसांबद्दल ट्विट

आज नाशिक परिक्षेत्राचे पोलीस महानिरीक्षक डाॅ. प्रताप दिघावकर यांच्यासह पोलीस अधीक्षक मनोज पाटील, अप्पर पोलीस अधीक्षक डाॅ. दीपाली काळे, पोलीस उपाधीक्षक संदीप मिटके यांनी व्यापारी गौतम हिरण यांचे अपहरण झालेल्या ठिकाणी 'बेलापूर-राहुरी बायपास' येथील ठिकाणाची पाहणी केली. ज्या परिसरात हिरण यांचा मृतदेह आढळला होता. त्या ठिकाणी 'वाकडी शिवारात' पोलीस फोजफाटा रवाना केला आहे.

या प्रकरणाचा सर्व अंगांनी तपास केला जात आहे.