अहमदनगर : राज्य शासनाने बंदी घातलेल्या सुगंधी तंबाखूचा साठा केलेल्या गोदामावर कोतवाली पोलिसांनी छापा घातला. यावेळी एक लाख २१ हजार ८०० रुपये किमतीची सुगंधी तंबाखू जप्त करून दोन आरोपींना अटक करण्यात आली.

कोतवाली पोलिस ठाण्याचे निरीक्षक संपतराव शिंदे यांना खबऱ्याकडून माहिती मिळाली, की केडगाव परिसरात काही व्यक्‍तींनी सुगंधी तंबाखूचा साठा केला आहे. सहायक पोलिस निरीक्षक मनोज कचरे यांच्या मार्गदर्शनाखालील पथकाने केडगावातील भूषणनगरमध्ये छापा घातला. आरोपी अक्षय बापू राहिंज (वय २८, रा. भूषणनगर, केडगाव), माहरूफ अजीज शेख (वय २२, रा. काटवन खंडोबा, नगर) या दोघांच्या ताब्यातून पाच किलो वजनाच्या प्रत्येकी पाच बॅगा, ५० किलो सुगंधी तंबाखू, ४० किलो वजनाची तंबाखू असलेली १२ पोती, बारीक केलेली ३० किलो सुपारी, मावा तयार करण्याचे २० हजार रुपये किमतीचे मशिन, असा एक लाख २१ हजार ८०० रुपयांचा मुद्देमाल जप्त करण्यात आला. दोन्ही आरोपींना अटक करण्यात आली आहे.