Jayant Patil on Sharad Pawar: भाजपने खोटी आश्वासने देऊन लोकांना फसवण्याचे काम केले. आता दुसऱ्या पक्षाचे आमदार फोडण्याचा उद्योग सुरू आहे. लोकप्रतिनिधींवर दबाव आणला जातो, हे सर्व लोकांना माहिती आहे. सर्वांना आपल्यासोबत घेऊन सरकार आणता येईल, असे त्यांना वाटते. परंतु शरद पवार यांचा झंझावात कायम आहे, तो या निवडणुकीतही दिसेल, असा आशावाद राष्ट्रवादी काँग्रेसचे प्रदेशाध्यक्ष जयंत पाटील यांनी व्यक्त केला.

शिर्डीत राष्ट्रवादी काँग्रेस पक्षाच्या शिबिरात दुसऱ्या दिवशी सायंकाळच्या सत्रात पाटील बोलत होते. पक्षातील कार्यकर्ते आणि पदाधिकाऱ्यांना त्यांनी आक्रमकपणे लढण्याचा सल्ला दिला. ते म्हणाले की, निवडणुकीच्या पार्श्वभूमीवर सर्वांची बैठक घेतली आहे. पक्षाची ध्येय-धोरणे लोकांपर्यंत पोहोचवा. सर्वांनी एकदिलाने लढा दिला, तर यश आपलेच आहे.

सर्व घटकपक्षांसोबत बोलणी सुरू आहे. जेथे आपली ताकद आहे, तेथील जागा लढविल्या जातील. जेथे आपला उमेदवार नाही, तेथील जागाही निवडून आणण्यासाठी शर्थीचे प्रयत्न करा. ज्या मतदारसंघात माणूस नाही, तेथे नवा माणूस उभा केला जाईल. (Latest Marathi News)

प्राजक्त तनपुरे यांचे कौतुक

राष्ट्रवादी काँग्रेस पक्षात उभी फूट पडल्यानंतर हे पहिलेच शिबिर शिर्डीत पार पडले. आज या शिबिराचा समारोप झाला. या शिबिरासाठी राज्यातून तब्बल दीड हजाराहून अधिक पदाधिकारी उपस्थित होते. पक्षातील आमदार, खासदारांचीही उपस्थिती होती. या शिबिराचे नेटके नियोजन केल्याने राहुरीचे आमदार प्राजक्त तनपुरे यांचे जयंत पाटील यांनी कौतुक केले. आभार जिल्हाध्यक्ष राजेंद्र फाळके यांनी मानले. (Latest Marathi News)