श्रीगोंदे (जि. नगर) : केवळ शब्दांची आतषबाजी करणाऱ्या मुख्यमंत्री उध्दव ठाकरे सरकारने शेतकऱ्यांच्या फसवणुकीत आणखी एक पाऊल पुढे टाकले आहे. नैसर्गिक संकटात भरडलेल्या शेतकऱ्याच्या मदतीऐवजी स्वतःच्या जाहिरातबाजीवरच १६० कोटींची उधळपट्टी करून सरकारने शेतकऱ्यांच्या जखमेवर मीठ चोळल्याची टीका आमदार बबनराव पाचपुते यांनी केली आहे.

पत्रकात पाचपुते यांनी म्हटले आहे की, मुख्यमंत्री ठाकरे यांनी राणा भीमदेवी थाटात संकटग्रस्त शेतकऱ्यांचे कर्ज माफ करण्याची गर्जना विधिमंडळात केली. त्याला दीड वर्ष उलटून गेल्यानंतरही शेतकऱ्यांच्या पदरात कर्जमाफी पडलेली नाही. खोट्या जाहिरातींवर १६० कोटींची उधळपट्टी करण्याऐवजी दीडशे कोटी रुपये कर्जमाफीसाठी दिले असते, तर संकटग्रस्त शेतकऱ्यांना दिलासा मिळाला असता. राज्यातील शेतकऱ्यांच्या बांधावर जाऊन कर्जमुक्त करण्याची घोषणा ठाकरे यांनी केली होती. प्रत्यक्षात मात्र वीज दरवाढीचे धक्के देऊन शेतकऱ्यास वेठीस धरले जात आहे, पीकविम्याबाबतही विमा कंपन्यांशी साटेलोटे करून शेतकऱ्यांची फसवणूक केली जात आहे.

राज्यातील दीड लाख शेतकरी कुटुंबांना या फसवणुकीचा फटका बसत असताना ठाकरे सरकार मात्र, पाहणी दौऱ्याच्या नावाखाली मर्सिडीझमधून पर्यटन करण्यात दंग आहेत. कर्जबाजारी शेतकऱ्यांना दोन लाख रुपयांपर्यंतची कर्जमाफी व नियमित कर्जफेड करणाऱ्या शेतकऱ्यांना ५० हजार रुपयांपर्यंत लाभ देण्याची घोषणा डिसेंबर २०१९ मध्ये मुख्यमंत्री ठाकरे यांनी केली होती. त्यावर कोणतीच कार्यवाही तर नाहीच, उलट त्यानंतर वादळ, अतिवृष्टीसारख्या संकटामुळे समस्यांमध्ये भर पडूनही सरकारने मात्र शेतकऱ्यांना वाऱ्यावर सोडले, अशी टीका पाचपुते यांनी केली.

सर्वांत लबाड सरकार

राज्यातील सर्वांत लबाड सरकार म्हणून ठाकरे सरकारची नोंद इतिहासात होईल. खंडणीखोरी, भ्रष्टाचारामुळे महाराष्ट्र रसातळाला चालला आहे. कोविडचे कारण सांगत जनतेला घरात डांबून ठेवून स्वतःची कातडी वाचविण्याचे सरकारचे कारस्थान आता उघड झाल्याचा हल्लाबोल पाचपुते केला.