नेवासे: "येळकोट... येळकोट... जय मल्हार...'चा गजर करीत, "वाघ्या-मुरळी यांना पेन्शन सुरू करा,' यासह विविध मागण्यांसाठी गुरुवारी (ता. 8) महाराष्ट्र राज्य वाघ्या-मुरळी परिषदेतर्फे नेवासे येथील खोलेश्वर गणपती चौकात जागरण-गोंधळ घालून आंदोलन केले. 

नेवाशाचे तहसीलदार रूपेश सुराणा यांना वाघ्या-मुरळी लोककलावंतांतर्फे निवेदन देण्यात आले. त्यात म्हटले आहे, की सर्व लोककलावंतांच्या मुला-मुलींच्या शिक्षणाचा खर्च शासनामार्फत करण्यात यावा, लोककलेला सरकारदरबारी अधिकृत मान्यता मिळवून नोंदणी करावी, कलावंतांच्या निवासासाठी शासनाकडून जमीन, घर स्वरूपात विशेष योजना मंजूर करण्यात यावी, वाघ्या-मुरळी यांना पेन्शन योजना सुरू करण्यात यावी व महाराष्ट्रातील लोककलावंतांसाठी आर्थिक विकास महामंडळ स्थापन करावे. 

सामाजिक अंतराचे पालन करत झालेल्या या आंदोलनात वाघ्या-मुरळी परिषदेचे जिल्हाध्यक्ष भास्कर मासाळ, तालुकाध्यक्ष लक्ष्मण नजन, गंगापूर तालुकाध्यक्ष अनिल दुधे, श्रीरामपूर तालुकाध्यक्ष एकनाथ मासाळ, सर्जेराव बेडके, सागर मासाळ, सोमनाथ नजन, बाबा वाघ, संतोष पाचे, संतोष नळघे, गोपाळ नजन, आकाश पाचे, सपना मुरळी आदी कलावंत सहभागी झाले होते. 

उदरनिर्वाहासाठी निधी द्या : नजन 
लोककलावंतांची कोरोना महामारीत मोठी उपासमार होत असल्याने, उदरनिर्वाहासाठी अनुदान स्वरूपात निधी देण्यात यावा, तसेच सरकारने आमच्या मागण्या सहानुभूतीने सोडवाव्यात, अशी मागणी वाघ्या-मुरळी परिषदेचे नेवासे तालुकाध्यक्ष लक्ष्मण नजन यांनी केली. 

संपादन - अशोक निंबाळकर