अकोले - अकोले तालुक्यात गेल्या वर्षात अचानक कुपोषित बालकांची संख्या वाढली होती. तालुक्यातील ही संख्या हजाराच्या पुढे गेली होती. मात्र, यंदा ही संख्या घटली आहे. जिल्हा परिषद आणि पंचायत समितीच्या आरोग्य विभागाच्या अधिकारी-कर्मचाऱ्यांनी परिश्रम घेत कुपोषित बालकांची संख्या कमी करण्यात यश मिळविले. तालुक्यातील गेल्या पाच वर्षांत सर्वाधिक कुपोषित बालके २०२१ या वर्षातील आहेत. एक हजारपेक्षा बालके जास्त तीव्र व मध्यम तीव्र कुपोषित या वर्षात निघाली.

अकोले तालुक्यात बालकांसाठी अकोले व राजूर असे दोन विभाग आहेत. दोन्ही विभागांत कुपोषित बालकांचा आकडा २०२१ मध्ये हजाराच्या वर गेला होता. त्यामुळे चिंता वाढली होती. कोरोना काळात अंगणवाडी सेविकांना अन्न शिजवून देण्याचे काम बंद करण्यात आले होते. त्यामुळे अंगणवाडी सेविकांनी जिवाची पर्वा न करता बालकांसाठीच्या डाळी, पूरक अन्न, अंडी, केळी पालकांच्या ताब्यात दिले. काही सामाजिक संघटनांनी या बालकांना पोषणआहार दिला. मात्र, कुपोषणग्रस्तांचा आकडा कमी होण्याऐवजी वाढला. कोरोना काळात घरातील लहान बालकांना अंगणवाडीत मिळालेल्या डाळी काही पालकांनी दुकानात विकल्या, तर काहींनी त्या पाहुण्यांना दिल्या. अंडी, केळी यांवर घरातील व्यक्तींना ताव मारला, असे अंगणवाडी सेविकेने सांगितले.

कुपोषण कमी करण्यासाठी समता फाउंडेशन व रोटरी क्लबचे मोठे सहकार्य लाभल्याचे तालुका महिला बालविकास प्रकल्प अधिकारी हरिभाऊ हाके, भारती साताळकर यांनी सांगितले. जिल्हा परिषदेचे मुख्य कार्यकारी अधिकारी राजेंद्र क्षीरसागर यांनी योग्य नियोजन करून हा आकडा निम्म्यावर आणला.

आकडेवारी २०२१ ची आहे. सध्या हा आकडा घटला आहे. विविध पातळ्यांवर कुपोषित बालकांची आरोग्य तपासणी सामाजिक संस्थांच्या सहकार्याने सुरू आहे. शिबिरे घेऊन बालकांना सुदृढ यादीत आणण्यासाठी विशेष लक्ष दिले जात आहे. पालकांनी सजग राहावे व यंत्रणेला सहकार्य करावे.

- डॉ. श्यामकांत शेटे, तालुका आरोग्य अधिकारी