अहमदनगर - पाच ते पन्नास हजार रुपयांपर्यंतचे कर्ज तत्काळ देणाऱ्या बँका, मल्टिस्टेट आणि बिगर बँक प्री-पेड पेमेंट इन्स्ट्रुमेंट (पीपीआर) कंपन्या कार्यरत आहेत. तत्काळ अवघ्या काही मिनिटांमध्ये कर्ज मिळत असल्याने, अनेक जण हे कर्ज घेतात. वसुलीचा प्रकार त्रासदायक असल्याने, तसेच फसवणुकीमुळे हा प्रकार डोकेदुखी ठरत आहे.

या कंपन्यांकडून कर्जवसुलीसाठी नातेवाइकांना फोन करणे, फोटो मॉर्फिंग करून त्रास देणे, असे गैरप्रकार करून अवाच्या सव्वा कर्ज वसूल केले जाते. हे प्रकार जिल्ह्यात वाढत असल्याने, त्यापासून सावध राहण्याचा इशारा पोलिस प्रशासन देत आहे.

फेसबुक किंवा इतर सोशल मीडियावर अल्पावधीत कर्जाबाबत विविध जाहिराती येत असतात. त्यामध्ये फसवणूक करणाऱ्यांकडून गुगल प्ले स्टोअरवरून एक ॲप डाऊनलोड करण्यास सांगतात. ॲप डाऊनलोड केल्यानंतर आपल्याकडून आपल्या मोबाईलमधील फोन बुक, फोटो गॅलरी, लोकेशन आदींसह सर्व माहितीचे ॲक्सेस घेतले जातात. केवळ आधार कार्ड व मोबाईल क्रमांकावरील ओटीपीवरून तत्काळ पाच ते पन्नास हजारांपर्यंत कर्ज प्राप्त होते.

नागरिक घेतलेले कर्ज फेडतात; परंतु फसवणूक करणारे पुन्हा फोन करून अधिक पैशांची मागणी करतात. शिवीगाळ, दमदाटी केली जाते. त्यानंतरसुद्धा पैसे न भरल्यास आपल्या फोनबुकमधील सुरक्षित (सेव्ह) असलेल्या नातेवाईक व मित्रांना फोन, मेसेज करून कर्ज घेणाऱ्यांची बदनामी केले जाते. त्यानंतरसुद्धा पैसे न भरल्यास फोटो गॅलरीमधील कुटुंबांतील महिलांचे फोटो अश्लील मॉर्फिंग करून फोनमध्ये सेव्ह असलेल्या नातेवाइकांना पाठविले जातात किंवा दिल्ली पोलिसमधून बोलत असल्याचे सांगून दमदाटी केली जाते. या सर्व प्रकाराला घाबरून अनेक नागरिक कर्जापेक्षा अधिक पैसे भरतात. नागरिकांची आर्थिक फसवणूक तर होतेच; पण खूप मोठ्या प्रमाणात मानसिक त्रास सहन करावा लागतो.

रिझर्व्ह बँकेकडून यादी जाहीर

आर्थिक क्षेत्रातील नामांकित बँका, फायनान्स कंपन्यांच्या नावाशी साधर्म्य साधून फसव्या कर्ज ॲपची तयार करण्यात आले आहेत. भारतीय रिझर्व्ह बँकेच्या संकेतस्थळावर फसव्या कर्ज ॲपची यादी प्रसिद्ध करण्यात आली आहे.