नगर : महापालिकेतर्फे सावेडी कचरा डेपोत हवेपासून ऑक्सिजननिर्मितीचा प्रकल्प उभारला जाणार आहे. महापालिका आयुक्तांच्या निर्देशानुसार आवश्यक विषय म्हणून स्थायी समितीची काल (शुक्रवारी) विशेष सभा घेण्यात आली. तीत या प्रकल्पाला मंजुरी देण्यात आली. याद्वारे कोरोनाच्या तिसऱ्या लाटेच्या पार्श्‍वभूमीवर महापालिका प्रशासनाने रुग्णांना ऑक्सिजनची कमतरता भासू नये याची तयारी सुरू केली आहे.

स्थायी समितीचे सभापती अविनाश घुले यांनी स्थायी समितीची ऑनलाइन सभा बोलावली होती. महापालिका आयुक्त शंकर गोरे यांनी विशेष बाब म्हणून स्थायी समितीची सभा घेण्याचे निर्देश काल दिले होते. त्यामुळे एकाच दिवशी स्थायी समितीच्या सलग दोन सभा झाल्या. यावेळी ऑक्सिजननिर्मिती प्रकल्प उभारण्यास मान्यता देण्यात आली. प्रकल्पाद्वारे रोज सात मेट्रिक टन ऑक्सिजन निर्माण होणार आहे. प्रकल्पउभारणीसाठी दोन निविदा प्राप्त झाल्या आहेत. (Oxygen Generation Project at Sawedi Waste Depot)

या वेळी नगरसेवक प्रकाश भागानगरे यांनी शहरातील रुग्णालयांत ऑक्सिजन तुटवडा जाणवलाच, तर ऑक्सिजन वाटपाचे अधिकार महापालिका प्रशासनाकडे राखून ठेवण्याची सूचना मांडली. रवींद्र बारस्कर यांनी कोरोनाची तिसरी लाट येण्यापूर्वीच प्लँट सुरू होईल, अशा पद्धतीने तयारी करण्यात यावी, अशी मागणी केली. त्यावर प्रकल्पाचे प्रमुख राजेंद्र मेहत्रे यांनी, २५ दिवसांत प्रकल्प उभा राहणार असल्याची माहिती दिली.

घुले यांनी शहरातील अनेक प्रकल्प वर्षानुवर्षे प्रलंबित आहेत. अधिकाऱ्यांनी ऑक्सिजन प्रकल्प सुरू करण्यात अडथळे आणू नयेत. प्रकल्पाची निविदा काढताना प्लँटवर महापालिकेचा अंकुश राहील अशा पद्धतीने तयार करावी. प्रकल्पउभारणी कामाचा दैनंदिन अहवाल स्थायी समितीला सादर करावा, अशा सूचना केल्या. नालेसफाईच्या कामासंदर्भात डॉ. सागर बोरुडे यांनी प्रश्न उपस्थित केले. त्यावर सुरू असलेल्या कामाची माहिती घनकचरा विभागप्रमुख शंकर शेडाळे यांनी दिली.

नगरसेवकांना मिळेना अधिकाऱ्यांकडून माहिती

शहरातील अनेक प्रकल्पांसंदर्भात महापालिकेच्या अधिकाऱ्यांकडून स्थायी समितीसह नगरसेवकांना माहिती दिली जात नाही, असा आरोप नगरसेवक डॉ. सागर बोरुडे यांनी केला. त्यावर सभापती अविनाश घुले यांनी नाराजी व्यक्त केली, तसेच मागितलेली माहिती न दिल्यास कारवाई करण्यात येईल, असा इशारा दिला.

(Oxygen Generation Project at Sawedi Waste Depot)