अहमदनगर : ३५ फोटो प्रो प्रोफेशनल फोटोग्राफी कम्युनिटी (रशिया) यांनी आयोजित केलेल्या ३५ अॅवॉर्ड्‌स या आंतरराष्ट्रीय फोटोग्राफी स्पर्धेचा निकाल नुकताच जाहीर झाला. त्यामध्ये शहरातील ओंकार बेद्रे यांच्या छायाचित्रांनी सिरीज (९ छायाचित्रे) जागतिक स्तरावर तिसरा क्रमांक पटकाविला.

या स्पर्धेमध्ये 174 देशांतील 1 लाख 04 हजार 814 छायाचित्रकारांनी सहभाग घेतला होता. एकूण 4 लाख 45 हजार छायाचित्रे सदर स्पर्धेसाठी प्रवेशिका म्हणून आली होती. या स्पर्धेचे परीक्षण जगातील 50 देशांतील 50 नामांकित छायाचित्रकारांनी केले.

या स्पर्धेमध्ये ओंकार यांनी सूर्यास्ताच्या वेळी भारतीय लांडग्याच्या छायाचित्रांची सिरीज जागतिक स्तरावर पाठवली होती. ती 35 छायाचित्रांच्या सिरीजमध्ये सामील झाली. त्या सिरीजला जागतिक पातळीवर तिसरा क्रमांक मिळाला.

वरील स्पर्धेमध्ये दर वर्षी जगातील सर्वश्रेष्ठ 35 छायाचित्रांच्या सिरीज निवडतात. या वर्षी स्पर्धेमध्ये भारतातील फक्त 4 छायाचित्रकारांचा समावेश होता. त्यांपैकी अहमदनगरचा ओंकार जागतिक पातळीवर तिसर्‍या स्थानी झळकला. ओंकारने सलग चौथ्या वर्षी मिळविलेल्या यशामुळे अहमदनगरचे नाव जागतिक पातळीवर पुन्हा झळकले.

पहिल्या छायाचित्रात लांडगा ओरडताना दिसत आहे. त्याच्या मागील बाजूस सूर्य अस्ताला जात असल्याचे दिसते आहे. दुसऱ्या छायाचित्रात कोल्ह्याला दोन्ही बाजूंनी वेढले आहे. तिसरे छायाचित्र संपूर्ण तांबडा समुद्र असल्याचे भासते आहे. हे छायाचित्र परीक्षकांना भावले आहे. त्यांनी लांडग्याच्या या सिरीजला तिसरा क्रमांक दिला आहे.

दीड वर्ष वाट पाहिली

रशियातील छायाचित्र प्रदर्शनासाठी ओंकारने पाठविलेल्या लांडग्याची सीरिज कॅमेराबद्ध करण्यासाठी त्याला तब्बल दीड वर्ष लागले. नर-मादी आणि त्यांच्या पिलाची ही छायाचित्रे आहेत. लहानपणापासूनच तो लांडग्याच्या या कुटुंबावर वॉच ठेवून होता. विशेष म्हणजे नगर परिसरातच ओंकारने ही छायाचित्रे काढली आहेत. एकेक छायाचित्र मिळवण्यासाठी महिना महिना वाट पाहावी लागत असल्याचे ओंकारने दैनिक ‘सकाळ’शी बोलताना सांगितले.