राहुरी : तालुक्यातील 82 ग्रामपंचायतींच्या सरपंच पदाचे सन 2020-25 या पाच वर्षासाठी आरक्षण आज जाहीर झाले. वांबोरी ग्रामपंचायतीत नुकतेच सत्तांतर झाले. परंतु, बहुमत असूनही आरक्षणाचा सदस्य विरोधी असल्याने, "गड आला पण सिंह गेला" अशी सत्ताधाऱ्यांची परिस्थिती झाली आहे. 

आज राहुरी येथे पालिकेच्या केशररंग मंगल कार्यालयात तहसीलदार फसियोद्दीन शेख यांनी आरक्षणाची सोडत काढली. नायब तहसीलदार गणेश तळेकर, गटविकास अधिकारी गोविंद खामकर, तालुका कृषी अधिकारी महेंद्र ठोकळे उपस्थित होते.

अनुसूचित जाती, अनुसूचित जमाती व नागरिकांचा मागास प्रवर्गाचे सरपंच पदाचे आरक्षण सोडत काढतांना सन 1995 पासून मागील पाच पंचवार्षिकमध्ये पडलेले आरक्षण विचारात घेण्यात आले.

मागील पंचवीस वर्षात अनुसूचित जाती, जमाती व प्रवर्गाचे आरक्षण झालेल्या ग्रामपंचायती वगळून उर्वरित ग्रामपंचायतींचे आरक्षण काढण्यात आले. त्यात, 2011 च्या जनगणनेनुसार जातीनिहाय लोकसंख्येची उतरत्या क्रमाने टक्केवारीनुसार आरक्षणावर शिक्कामोर्तब करण्यात आले. नंतर स्त्री व पुरुष आरक्षण चिठ्ठ्या टाकून काढण्यात आले. 

उंबरे, धानोरे, मल्हारवाडी येथे झालेल्या आरक्षणाचा एकही सदस्य नसल्याने, तेथील सरपंचपद रिक्त राहणार आहे. नव्याने स्थापन झालेल्या वाघाचा आखाडा ग्रामपंचायतीची अद्याप निवडणूक झालेली नाही. त्यामुळे, तेथील सरपंच पदाचे आरक्षण सोडत काढली नाही.

या ग्रामपंचायतीत मंत्री प्राजक्त तनपुरे यांना मानणाऱ्या बाबासाहेब भिटे यांच्या नेतृत्वाखाली पॅनेलने सत्ता मिळवली. परंतु जिल्हा परिषदेचे माजी अध्यक्ष, भाजप नेते अॅड. सुभाष पाटील यांच्या गटाचा सरपंच होणार आहे.

"उंबरे, धानोरे, मल्हारवाडी येथे आरक्षणानुसार सदस्य नाही. तेथे, सरपंच पदाच्या निवडणुकीनंतर रिक्त पदाचा अहवाल जिल्हाधिकारी यांच्याकडे पाठविला जाईल. तेथे जिल्हाधिकारी यांना आरक्षणात बदल करण्याचा अधिकार आहे.

- फसियोद्दीन शेख, तहसीलदार, राहुरी."

 

ग्रामपंचायत निहाय आरक्षण असे :
अनुसूचित जाती (पुरुष) : ताहाराबाद, कुक्कडवेढे, वांबोरी, चेडगाव, केंदळ खुर्द. (महिला) : मांजरी, मल्हारवाडी, मुसळवाडी, वळण, खुडसरगांव, चिंचाळे.
अनुसूचित जमाती (पुरुष) : वरशिंदे-वाबळेवाडी, रामपूर, कात्रड, केंदळ बुद्रुक, खडांबे खुर्द. (महिला) : मालुंजे खुर्द, शिलेगाव, धानोरे, ब्राम्हणगाव भांड, उंबरे.

नागरीकांचा मागास प्रवर्ग (पुरुष) : तुळापूर, पिंपळगाव फुणगी, आंबी, चांदेगाव, चिंचविहिरे, कणगर बुद्रुक, वावरथ, जांभळी-जांभुळबन, पिंप्री वळण, करजगाव, गणेगाव. (महिला) : सोनगाव, सडे, धामोरी खुर्द, वडनेर, मोमीन आखाडा, चिखलठाण, दरडगाव थडी, टाकळीमिया-मोरवाडी, बाभुळगाव, कानडगाव, डिग्रस.

सर्वसाधारण (पुरुष) : सात्रळ, निंभेरे, तांदुळनेर, तांभेरे, कोळेवाडी, घोरपडवाडी, बारागाव नांदूर, कोंढवड, तांदुळवाडी, वरवंडी, खडांबे बुद्रुक, गुंजाळे, संक्रापूर, दवणगाव, केसापूर, बोधेगाव, लाख, पाथरे खुर्द, कोपरे, तिळापुर. (महिला) : गुहा, कुरणवाडी, म्हैसगाव, राहुरी खुर्द, मानोरी, देसवंडी, तमनर आखाडा, पिंप्री अवघड, ब्राह्मणी, मोकळ ओहोळ, धामोरी बुद्रुक, चिंचोली, गंगापूर, अंमळनेर, जातप, माहेगाव, वांजुळपोई, कोल्हार खुर्द, आरडगाव. 

संपादन - अशोक निंबाळकर