शिर्डी : कोणे एके काळी, माजी खासदार (कै.) शंकरराव काळे यांच्या काळात त्यांचा नगर येथील "लता कुंज' बंगला जिल्ह्याच्या राजकारणाचा केंद्रबिंदू होता. तीन पिढ्यांनंतर आज तोच जिल्हा बॅंकेच्या राजकारणाचा केंद्रबिंदू ठरला.

येथे बैठक मारून महसूलमंत्री बाळासाहेब थोरात यांनी काल सूत्रे हलविली. त्याचा परिणाम आमदार आशुतोष काळे व विवेक कोल्हे या दोन प्रतिस्पर्धी मातब्बर घराण्यांतील युवा नेत्यांची जिल्हा बॅंकेवर बिनविरोध निवड झाली.

सहकारात सहमती महत्त्वाची, हे सूत्र त्यांनी तिसऱ्या पिढीतही जपले. "लता कुंज' बंगला प्रदीर्घ कालखंडानंतर पुन्हा चर्चेत आला. 

हेही वाचा - लंघेंनी माघार घेतली नसती तर गडाखांकडे प्लॅन बी तयार होता

माजी खासदार (कै.) शंकरराव काळे यांनी दहा वर्षे जिल्हा परिषदेचे अध्यक्षपद भूषविले. याच काळात जिल्ह्यातील मातब्बर नेत्यांनी एकत्र येऊन नगर येथे यशवंत हाऊसिंग कॉलनी स्थापन केली. तीत काळे यांच्यासोबत आबासाहेब निंबाळकर, यशवंतराव गडाख, माजी खासदार बाळासाहेब विखे पाटील, मारुतराव घुले, आबासाहेब देशमुख या दिग्गज नेत्यांनी बंगले बांधले.

काळे यांनी आपल्या बंगल्यास कन्या लता यांचे नाव दिले. या "लता कुंज' बंगल्यावरून त्या काळी जिल्ह्याच्या राजकारणाची आणि कॉंग्रेस पक्षांतर्गत स्वामी सहजानंद भारती गटाची सूत्रे हलविली जात. एका अर्थाने हा "लता कुंज' बंगला त्या काळी जिल्ह्याच्या राजकारणाचा केंद्रबिंदू असे. 

कालांतराने राजकारणाने दिशा बदलली. एकाच गटाचे प्रतिनिधित्व करणारे माजी खासदार शंकरराव काळे आणि माजी आमदार शंकरराव कोल्हे हे एकमेकांचे कट्टर प्रतिस्पर्धी म्हणून पुढे आले. कोपरगाव तालुक्‍यातील माजी आमदार के. बी. रोहमारे यांचे युग संपले. काळे-कोल्हे संघर्षाचे युग सुरू झाले. कोल्हे यांनी प्रदीर्घ काळ तालुक्‍यावर वर्चस्व कायम ठेवले. मात्र, सहकारात या दोन्ही दिग्गज नेत्यांनी अनेकदा सहमतीचे राजकारण जपले.

ही सहमती माजी आमदार अशोक काळे व त्यांचे प्रतिस्पर्धी बिपीन कोल्हे यांच्या काळातही सुरू राहिली. आता आमदार आशुतोष काळे व विवेक कोल्हे हे तिसऱ्या पिढीचे प्रतिनिधी आहेत. त्यांच्यातही सहमतीवर मतैक्‍य झाले. योगायोग असा, की यंदा महसूलमंत्री बाळासाहेब थोरात यांनी "लता कुंज' बंगल्यावरूनच या सहमतीच्या राजकारणाची सूत्रे हलविली. 
- अशोक निंबाळकर