अहमदनगर - निवृत्त आयएएस अधिकारी एसटी बसने प्रवासाला निघाले. अर्धे तिकीट दिले नाही म्हणून थेट नियमाला भिडले. नियमावरून कंडक्टरही अडले. हे प्रकरण थेट पोलिस ठाण्यात पोचले. मग पोलिसांनी महाराष्ट्राचे नियम सांगितल्यावर गप्प बसले.

त्याचे असे झाले, उत्तर प्रदेश केडरचे सेवानिवृत्त आयएएस अधिकारी एम. एम. रस्तोगी आणि म्हैसूर (कर्नाटक) येथे केंद्र शासनाच्या सेंट्रल फूड टेक्नॉलॉजी अँड रीसर्च इन्स्टिट्यूटमध्ये (सीएफटीआरआय) वैज्ञानिक असलेला त्यांचे चिरंजीव डॉ. नवीन रस्तोगी हे म्हैसूरहून शिर्डीला साईबाबांच्या दर्शनासाठी गुरुवारी (ता. २३) रात्री कर्नाटक बसने पुण्यापर्यंत आले. पुण्याहून शिर्डीला येण्यासाठी पुणे-धुळे शिवशाही बसने (एमएच ६ बी डब्ल्यू ८५९) शिर्डीला येण्यासाठी सकाळी साडेआठ वाजता निघाले.

रस्तोगी यांनी ज्येष्ठ नागरिकांसाठीच्या सवलतीच्या तिकिटाची मागणी केली. वाहकाने पूर्ण तिकीट घेण्यास सांगितले. तुम्ही महाराष्ट्रातील रहिवासी नसल्यामुळे तुम्हाला पूर्ण तिकीट घ्यावे लागेल, असे सांगितले. रस्तोगी पिता-पुत्रांनी आपले आधार कार्ड, तसेच ओळखपत्र दाखवून आधार कार्डवरील वयानुसार ज्येष्ठ नागरिक ठरत असल्याचे सांगितले. म्हैसूरहून पुण्याला येताना कर्नाटक परिवहन मंडळाच्या बसने ज्येष्ठ नागरिकाचे तिकीट दिल्याचे दाखविले.

एसटी बसवाहक शिर्डीचे पूर्ण तिकीट ४५५ रुपये घेण्याबाबत ठाम राहिला. त्यामुळे रस्तोगी यांनी मंत्रालयातील वरिष्ठ आयएएस अधिकाऱ्यांना ही माहिती दिली, तसेच बस अहमदनगरला आल्यानंतर एसटी महामंडळाच्या वरिष्ठ अधिकाऱ्यांशी या विषयावर चर्चा करण्याचा निर्णय घेतला. या ठिकाणी अगर प्रमुखांशी त्यांचा वाद झाला. त्यानंतर बस एसटीच्या सर्जेपुरा विभागीय कार्यालयात आणण्यात आली. त्यामुळे प्रवासी अन्य बसमध्ये बसवून देण्याची मागणी करू लागले.

अखेर सर्व प्रवाशांना दुसऱ्या बसमध्ये बसवून पुढील प्रवासासाठी रवाना करण्यात आले. एसटी महामंडळाचे वरिष्ठ अधिकारी आणि पिता-पुत्रांमध्ये वाद झाले. दोघांनीही एकमेकांविरुद्ध कायदेशीर कारवाई करण्याचे ठरविले. रस्तोगी यांनी बस तोफखाना पोलिस ठाण्यात दुपारी एक वाजता नेली. एसटीचे वरिष्ठ अधिकारीही तोफखाना पोलिस ठाण्यात आले. त्यामुळे त्यांच्या समवेत या कार्यालयातील इतर कर्मचारी आणि वाहक, चालक आणि तिकीट तपासणी पथकातील इतर कर्मचारीही तोफखाना पोलिस ठाण्यात आले.

पोलिस निरीक्षक ज्योती गडकरी यांनी एसटी

महामंडळाचे अधिकारी आणि रस्तोगी पिता-पुत्र यांचे म्हणणे ऐकून दोघांनाही समजावून सांगितले. त्यामुळे परस्परविरोधी गुन्हे दाखल करण्याचा निर्णय दोघांनी अखेर रद्द केला.

ज्येष्ठ नागरिकांना तिकिटात असलेली सवलत ही फक्त महाराष्ट्रातील रहिवासी असलेल्या नागरिकांसाठीच आहे. इतर राज्यांतील प्रवाशांना तिकिटात ही सवलत देता येत नाही. एसटी महामंडळाचे अधिकारी आणि कर्मचारी हे प्रवाशांशी सौजन्याने आणि नियमानुसार वागतात.

- विजय गिते, विभाग नियंत्रक, अहमदनगर.