अहमदनगर : संजय गांधी निराधार अनुदान योजनेतील लाभार्थ्यांच्या अनुदानात ५० टक्के वाढ होणार आहे. जुलै महिन्यापासून आता दीड हजार रुपये अनुदान मिळणार आहे. यापूर्वी लाभार्थ्यांना एक हजार रुपये देण्यात येत होते.

जिल्ह्यातील २ लाख २१ हजार ८६८ लाभार्थ्यांना लाभ मिळेल. याचबरोबर एचआयव्ही, क्षयरोग, कुष्ठरोग, पक्षाघात (अर्धांगवायू) यांसह गंभीर १४ आजारांच्या रुग्णांनाही योजनेचा लाभ मिळणार आहे.

राज्य शासन पुरस्कृत सामाजिक अर्थसाहाय्य योजनेतून समाजातील विविध दुर्बल घटकांतील व्यक्तींना अर्थसाहाय्य दिले जाते. विधवा, अपंग (दिव्यांग), परित्यक्त्या, निराधार, घटस्फोटीत अशा १८ ते ६५ वयोगटातील व्यक्तींना संजय गांधी निराधार अनुदान योजनेतून लाभ दिला जातो.

६५ वर्षांपुढील व्यक्तींना श्रावण बाळ सेवा राज्य निवृत्ती वेतन योजनेतून अर्थसाहाय्य दिले जाते. केंद्र शासनाच्या सामाजिक अर्थसाहाय्य योजनेतून ‘इंदिरा गांधी राष्ट्रीय वृद्धापकाळ निवृत्तिवेतन योजना’ राबविली जाते.

दारिद्र्य रेषेखालील यादीत व्यक्तींना ६५ वर्षांपुढील व्यक्तीस लाभ दिला जातो. इंदिरा गांधी राष्ट्रीय विधवा निवृत्तिवेतन योजना ही दारिद्र्य रेषेखालील कुटुंबातील विधवांसाठी आहे. ४० ते ७९ वयोगटातील महिलांसाठी ही योजना आहे.

संजय गांधी निराधार अनुदान योजनेत समाजातील इतर उपेक्षित घटकांचा समावेश करण्यात आला आहे. तृतीयपंथी व्यक्तींनाही योजनेचा लाभ दिला जातो. एचआयव्ही, क्षयरोग, कुष्ठरोग, पक्षाघात अशा गंभीर १४ आजाराच्या रुग्णांना या योजनेचा लाभ दिला जात आहे. त्यासाठी वैद्यकीय प्रमाणपत्र आवश्‍यक आहे. कोरोना आजारामुळे निराधार झालेल्या मुलांचाही विशेष बाब म्हणून या योजनेसाठी समावेश करण्यात आला आहे.

- विशाल नाईकवाडे, तहसीलदार, संजय गांधी निराधार योजना

जिल्ह्यातील लाभार्थी संख्या

• संजय गांधी निराधार अनुदान योजना - ५४ हजार ३७१

• श्रावणबाळ सेवा राज्य निवृत्तिवेतन - १ लाख २५ हजार ३७७

• इंदिरा गांधी राष्ट्रीय वृद्धापकाळ योजना - ३९ हजार ७७७

• इंदिरा गांधी राष्ट्रीय विधवा निवृत्तिवेतन योजना - २ हजार २५०

• इंदिरा गांधी राष्ट्रीय अपंग निवृत्तिवेतन योजना - ९३