शिर्डी - देश-विदेशातील भाविकांना वरदान ठरू शकणाऱ्या शिर्डी विमानतळाच्या टर्मिनल बिल्डिंगची निविदा अखेर प्रसिद्ध झाली. महाराष्ट्र विमानतळ विकास कंपनीचे कार्यकारी संचालक दीपक कपूर यांनी ट्वीटद्वारे ही माहिती दिली.

पाचशे सत्तावीस कोटी रुपयांचे हे काम दोन वर्षांत पूर्ण करायचे आहे.

मागील साडेचार वर्षांपासून या विमानतळाची टर्मिनल बिल्डिंग म्हणून पत्र्याच्या शेडचा वापर केला जात आहे. विमानाच्या फेऱ्या वाढल्याने प्रवाशांना बसण्यासाठी हे शेड कमी पडते आहे. गर्दीच्या काळात प्रवाशांवर तिष्ठत उभे राहण्याची वेळ येते. पाऊस सुरू असताना पत्र्यामुळे मोठा आवाज येतो. उन्हाळ्यात वातानुकूलन यंत्रणेवर ताण येतो. गर्दी वाढली की गोंगाट वाढतो. प्रवाशांच्या बॅगांसाठी आवश्यक कन्व्हेअर बेल्ट, स्कॅनर, सिक्युरिटी चेक-अप या सुविधांसाठी जागेच्या मर्यादा येतात. विमानतळ सुरू होऊन साडेचार वर्षे लोटली, मात्र टर्मिनल बिल्डिंगच्या कामास सुरवात होऊ शकली नव्हती. आता निविदा प्रसिद्ध झाल्याने साईभक्तांच्या आशा पल्लवित झाल्या आहेत.

जाणकारांच्या मतानुसार या विमानतळाची उभारणी सुरवातीपासूनच, या कामाचा अनुभव असलेल्या केंद्र सरकारच्या एअरपोर्ट ऑथॉरिटी ऑफ इंडियाकडे द्यायला हवी होती. तत्कालीन केंद्रीय हवाई वाहतूकमंत्री प्रफुल्ल पटेल यांनी तशी इच्छा व्यक्त केली होती. मात्र, विमानतळ उभारणी आणि संचालनाचा अनुभव नसलेल्या महाराष्ट्र विमानतळ विकास कंपनीने हे काम स्वत:कडेच ठेवले. या विमानतळाच्या कुंपणाच्या भिंतींची परिस्थिती लक्षात घेतली, तर हे काम केंद्राकडे देण्याची गरज लक्षात येते. गेल्या साडेचार वर्षांत हे विमानतळ नावापुरतेच आंतरराष्ट्रीय राहिले. टर्मिनल बिल्डिंगचे कामदेखील सुरू होऊ शकले नाही. आता या कामाची निविदा प्रसिद्ध झाली. चांगला ठेकेदार मिळाला आणि वेळेत काम पूर्ण झाले, तर विमानाने येथे ये-जा करणाऱ्या साईभक्तांची गैरसोय दूर होऊ शकेल.