शिर्डी: शिर्डी ते अहमदनगर या अंतरातील राष्ट्रीय महामार्गाच्या दुर्दैवाचा फेरा सुरूच आहे. कामाची फेरनिविदा काढावी, अशी मागणी करून ठेकेदाराने काम अर्धवट स्थितीत बंद केले. फेरनिविदेसाठी किमान एक वर्षाचा कालावधी लागेल. तोपर्यंत ठिकठिकाणी खोदलेला आणि आधीच कमकुवत झालेला हा रस्ता तग धरील का? वाढणाऱ्या अपघातांची आणि त्यात बळी जाणाऱ्यांच्या कुटुंबीयांची जबाबदारी नेमकी कुणाची? असे अनेक गंभीर प्रश्न निर्माण झाले आहेत.

वरिष्ठ अधिकाऱ्यांनी दिलेल्या माहितीनुसार राष्ट्रीय हरित लवादाची स्टोन क्रशर सुरू करण्याची परवानगी नसल्याने ठेकेदाराने फेरनिविदेची मागणी करून काम बंद केले. त्याच्या मागणीचा विचार करायचा किंवा नाही, हे राष्ट्रीय महामार्गाचे दिल्ली कार्यालय ठरवेल. ठेकेदाराची अनामत रक्कम ताब्यात घेण्यासह इतर बरेच कायदेशीर मार्ग आहेत. ठेकेदार सांगतो म्हणून फेरनिवादेचा पर्याय स्वीकारला जाईलच, असे नाही.

राष्ट्रीय हरित लवादाने सर्वच ठेकेदार कंपन्यांना स्टोन क्रशर चालविण्याची परवानगी घेण्यास सांगितले आहे. या लवादास न्याय प्राधिकरणाचा दर्जा असल्याने ही परवानगी सहजासहजी आणि लवकर मिळणे शक्य नाही. खोदलेला रस्ता बुजवा, असे आदेश अधिकाऱ्यांनी ठेकेदार दिले. मात्र खडी तयार करायला परवानगी नाही, मग तो कसा बुजविणार, अशी भूमिका घेत त्याने काम बंद केले. थोडक्यात गेल्या पंचवीस वर्षांपासून सुरू असलेला खेळखंडोबा नव्या जोमाने पुन्हा सुरू झाला. पुढील पंधरवाड्यात पाऊस सुरू होण्याची शक्यता असताना अद्यापतरी खोदलेला रस्ता बुजविण्याचे काम सुरू झालेले नाही. खोदलेला भाग केवळ बुजवून चालणार नाही, तर तो शेजारच्या रस्त्यासारखा पक्का करावा लागेल. तरच त्यावरून जड वाहतूक सुरू राहील.

पंधरा दिवसांत काम पूर्ण होईल का?

शिर्डी ते अहमदनगर या अंतरात ठिकठिकाणी एकूण दहा किलोमीटर लांबीचा रस्ता खोदून ठेवण्यात आला आहे. तो मजबुत करून डांबरीकरण करावे लागेल. जे काम चार-पाच महिन्यांत झाले नाही, ते पुढील पंधरा दिवसांत पूर्ण करायला ठेकेदार राजी होईल का, हा खरा प्रश्न आहे