शिर्डी: उत्तर नगर जिल्ह्यातील वर्षानुवर्षे तहानलेल्या दोन लाख एकर कोरडवाहू क्षेत्रातील काळ्या आईची कूस उजवण्यासाठी महाविकास आघाडीने या अर्थसंकल्पात तब्बल तीनशे पासष्ट कोटी रुपयांची तरतूद केली. त्यातून निळवंडे कालव्यांचे काम पूर्ण होईल. येत्या पावसाळ्यात कालव्यातून पाणी वाहू लागेल. दुष्काळी टापूत निळवंडेच्या पाण्यामुळे हरितक्रांतीची पहाट उगवेल. त्यामुळे ही माहिती समजताच, दुष्काळाने पिचलेल्या या भागातील शेतक-यांच्या चेह-यांवर हसू फुलले. महाविकास आघाडी सरकारने गेल्या दोन वर्षांत तब्बल नऊशे छप्पन्न कोटी रुपयांची तरतूद केल्याने निळवंडे कालव्यांच्या कामास गती मिळाली. कालव्यांची कामे अपूर्ण असल्याने, या धरणात गेल्या दहा वर्षांपासून प्रत्येक पावसाळ्यात आठ टीएमसी पाणी साठते. दुष्काळी लाभक्षेत्र कोरडे ठाक आणि धरणाचे पाणी प्रवरा कालव्यात, अशी अन्यायकारक स्थिती निर्माण झाली होती.

वरिष्ठ अधिका-यांनी दिलेल्या माहितीनुसार, येत्या जून महिन्यात या कालव्यातून पाणी सोडून चाचणी घेतली जाईल. पुढील दीड वर्षात प्रत्यक्ष शेतापर्यंत पाणी जाईल, साठवण बंधारेदेखील भरता येतील. उजव्या- डाव्या कालव्यांचे ८० टक्के काम पूर्ण झाले. उर्वरित कामे पुढील चार महिन्यांत वेगाने पूर्ण होतील. या कामात कुठलाही आणि कसलाही अडथळा नाही. निळवंडे कृतिसमितीचे अध्यक्ष नानासाहेब जवरे म्हणाले, की आमच्या न्यायालयीन लढाईला यश आले आहे. महाविकास आघाडीने सलग दुस-या वर्षी मोठा निधी दिला.

निळवंडे कालव्यांसाठी निधी मिळावा, याकरिता आपण उपमुख्यमंत्री अजित पवार व अर्थमंत्री जयंत पाटील यांच्याकडे सातत्याने पाठपुरावा केला. कोविड प्रकोपाच्या काळातही महाविकास आघाडीने भरीव तरतूद केल्याने निळवंडे कालव्यांचे काम आता पूर्ण होणार आहे. यंदाची ३६५ कोटी रुपयांची तरतूद म्हणजे लाभक्षेत्रात येत्या पावसाळ्यात पाणी नेण्याची हमी, असे म्हणता येईल.

- आमदार आशुतोष काळे,अध्यक्ष, साईसंस्थान, शिर्डी

मुख्यमंत्री उद्धव ठाकरे, उपमुख्यमंत्री अजित पवार, खासदार सदाशिव लोखंडे, महसूलमंत्री बाळासाहेब थोरात, माजी खासदार प्रसाद तनपुरे, मंत्री प्राजक्त तनपुरे या सर्वांच्याच सहकार्यामुळे गेल्या दोन वर्षांपासून कालव्यांच्या कामावर भरीव तरतूद झाली. आम्ही गेल्या वीस वर्षांपासून याप्रश्नी संघर्ष करतो आहोत. येत्या पावसाळ्यात आमचे स्वप्न पूर्ण होणार आहे.

- नानासाहेब शेळके, अध्यक्ष, निळवंडे कृतिसमिती