सिद्धटेक : सध्या सर्वत्र सुरू असलेला चैतन्यदायी गणेशोत्सव पाहण्यासाठी परदेशी भाविकांची उपस्थिती लक्षणीय ठरते आहे. हजारो किलोमीटर अंतर पार करीत, भल्या मोठ्या गणेशमूर्तीसह गणेशोत्सवाचा मनमुरादपणे आनंद लुटणारे हे भाविक आहेत थायलंडचे. अत्यंत शांत व मितभाषी असणारी ही मंडळी दर वर्षी अष्टविनायक यात्रा करतात. सुमारे तीन वर्षांपासून खंडित झालेली ही यात्रा आता पुन्हा सुरू झाल्याने त्यांचा उत्साह अवर्णनीय आहे.

थाई गणेशभक्त व श्रीगणेशाचे नाते इतिहासात सातव्या शतकापासून आढळते. अत्यंत भक्तिभावाने हे भाविक गणेशाची पूजाअर्चा करतात. जागतिक पातळीवर सर्वांत जास्त गणेशमंदिरे थायलंडमध्ये आढळतात. तेथील उत्सवाचे नियोजन करून दर वर्षी हे भाविक महाराष्ट्रातील प्रसिद्ध अष्टविनायक यात्रा करतात.

२०-२५ भाविकांचे ठरावीक गट टप्प्या-टप्प्याने प्रसिद्ध गणेशस्थानांना भेट देतात. मोठमोठ्या गणेशमूर्तीसह ते विविध गणेश मंदिरांमध्ये जाऊन तेथे आरती करतात. त्या ठिकाणी श्रीगणेशाच्या पूजेसाठी आवश्यक सामग्रीची श्रद्धेने यथेच्छ खरेदी करतात. दरम्यान, येथे उपस्थित विद्यार्थ्यांशी त्यांनी हितगूज केले.

आमच्या देशात आयुद्या शहरात सर्वाधिक गणेशमूर्ती आहेत. राजधानी बँकॉकमधील बँकॉक नॅशनल म्युझियममध्येही अनेक प्रकारच्या गणेशमूर्ती आहेत. महाराष्ट्रातील श्रीगणेशाची तीर्थक्षेत्रे खूपच सुंदर आहेत.

-बुधसाबा थांगजान, थाई भाविक