अहमदनगर : बदलीप्रक्रिया नेहमीच पारदर्शक व नियमाला धरून होत असते. बदली होण्याच्या अगोदर कोणाला कोणत्या ठिकाणी नियुक्ती मिळणार, हे कोणत्याच विभागात स्पष्ट होत नाही; परंतु सध्या एसटी महामंडळाच्या अहमदनगर विभागात कोणता अधिकारी बदलून येणार आहे, याबाबत चर्चेला उधाण आलेले आहे. या चर्चेमुळे सध्या कर्मचाऱ्यांमधून नाराजी व्यक्त केली जात आहे.

राज्य परिवहन महामंडळाच्या अहमदनगर विभागात विभागीय भांडार अधिकारी, विभागीय वाहतूक अधिकारी यांसह सहा ते सात पदे रिक्त आहेत. या रिक्त पदांचा पदभार इतरांकडे देऊन सध्या दैनंदिन कामकाज केले जात आहे. कमी अधिकारी व कर्मचाऱ्यांच्या बळावर गेल्या अनेक दिवसांपासून अहमदनगर विभागाचे कामकाज सुरळीत सुरू आहे. कोरोना काळात एसटी तोट्यात गेलेली आहे. त्यानंतर एसटीचे चाक रुळावर येत असतानाच कर्मचाऱ्यांचा संप सुरू झालेला आहे. या संपामुळे एसटीचे मोठे नुकसान झालेले आहे. संप मिटवावा व कर्मचाऱ्यांनी कामावर यावे, यासाठी राज्य सरकारसह एसटी प्रशासनाचे प्रयत्न सुरू आहेत. मात्र काही जण, आपल्याला अहमदनगर जिल्ह्यात नियुक्ती मिळणार आहे, अशी चर्चा अधिकारी व कर्मचाऱ्यांमध्ये भेटून घडवून आणत आहेत. त्यामुळे कर्मचाऱ्यांमधून नाराजी व्यक्त केली जात आहे.

ही आहेत रिक्त पदे

• यंत्र अभियंता (चालन)

• विभागीय भांडार अधिकारी (नगर)

• विभागीय कर्मचारी वर्ग अधिकारी

• विभागीय वाहतूक अधिकारी

• विभागीय वाहतूक अधीक्षक

• संगमनेर, तारकपूर, पाथर्डी आगार व्यवस्थापन

अधिकारी व कर्मचाऱ्यांची सोय पाहण्यापेक्षा एसटीचे हित पाहणे गरजेचे आहे. सध्या काही अधिकारी नगरला येऊन, आपण येथे येणार असल्याची चर्चा सध्या सुरू आहे. ही चर्चा सध्याच्या एसटीच्या हिताची नसून, त्याविषयी कर्मचाऱ्यांमधून नाराजी व्यक्त होत आहे.

- रणजित श्रीगोड, जिल्हाध्यक्ष, प्रवासी संघटना

राज्य परिवहन महामंडळातील बदल्यांची प्रक्रिया सेवाज्येष्ठतेनुसार होत आहे.

- ज्ञानदेव अकोलकर, विभागीय सचिव, एसटी कामगार संघटना