अहमदनगर : भाजपचे माजी आमदार शिवाजी कर्डिले यांच्यावर गुन्हा दाखल करण्याचे आदेश न्यायालयाने दिले आहेत. असे असतानाही पोलिस प्रशासन त्याकडे दुर्लक्ष करत आहे. ॲड. अभिषेक भगत यांच्यावरील गुन्हा खोटा आहे.

पोलिस प्रशासन कोणाच्या हातचे बाहुले झाले आहे, कर्डिले यांच्यावर अनेक गुन्हे दाखल असतानाही त्यांच्यावर तडीपारीची कारवाई का होत नाही, असा सवाल आमदार प्राजक्त तनपुरे यांनी केला.

तनपुरे म्हणाले, की ॲड. भगत यांना कर्डिले यांनी जमिनीच्या वादावरून संपविण्याचा प्रकार केला आहे. याबाबत पोलिसांनी त्यांची तक्रार घेतलेली नाही. त्यामुळे त्यांना न्यायालयात जावे लागले. न्यायालयात जाऊन दाद मागितल्यावर न्यायालयाने कोतवाली पोलिस ठाण्याला यासंदर्भात गुन्हा दाखल करण्याचे आदेश दिले.

तरीदेखील कोतवाली पोलिस ठाण्याचे पोलिस निरीक्षक चंद्रशेखर यादव यांनी गुन्हा दाखल केला नाही. याप्रकरणी पोलिस उपाधीक्षक अनिल कातकडे यांची भेट घेऊन त्यांना निवेदन दिले आहे. कर्डिले यांच्यावर आठ दिवसांच्या आत गुन्हा दाखल झाला नाही तर आंदोलन करण्यात येईल.

पत्रकार परिषदेला शिवसेना उद्धव ठाकरे पक्षाचे जिल्हाप्रमुख प्रा. शशिकांत गाडे, उपजिल्हाप्रमुख गिरीश जाधव, भाजपचे सुवेंद्र गांधी, दिलीप सातपुते, काँग्रेसचे शहर जिल्हाध्यक्ष किरण काळे, नगरसेवक बाळासाहेब बोराटे, माजी जिल्हा परिषद सदस्य बाळासाहेब हराळ, राष्ट्रवादीचे शहर जिल्हाध्यक्ष अभिषेक कळमकर, जिल्हा परिषदचे माजी सदस्य शरद झोडगे, ॲड. अभिषेक भगत आदी उपस्थित होते.

कार्यवाही न झाल्यास आंदोलन

कर्डिले यांना तातडीने तडीपार करावे, अॅड. अभिषेक भगत यांच्यावर दाखल झालेला अॅट्रॉसिटीचा खोटा गुन्हा मागे घ्यावा, त्यांच्या जीवितास धोका असल्याने त्यांना त्वरित पोलिस संरक्षण द्यावे, या मागण्यांचे निवेदन तनपुरे यांच्या नेतृत्वाखालील सर्वपक्षीय शिष्टमंडळाने कातकडे यांना दिले. आठ दिवसांत या मागण्यांवर कार्यवाही झाली, नाही तर पोलिस अधीक्षक कार्यालयात आंदोलन करण्याचा इशारा यावेळी देण्यात आला.

भगत यांच्यावर ॲट्रॉसिटीचा खोटा गुन्हा दाखल केला आहे. हा गुन्हा दाखल करताना पोलिसांनी वरिष्ठांची परवानगी घेतली नाही. भाजपमध्ये जे नवीन लोक आले आहेत, त्यांच्या हातामध्ये पोलिस यंत्रणा गेली आहे.

- प्राजक्त तनपुरे, आमदार