राहुरी : ‘‘वसुधैव कुटुंबकम्‌ या संस्कारामुळे संपूर्ण विश्वाला आपण परिवार मानतो. त्यामुळे कोरोना महामारीत भारतीय समाज खंबीरपणे एकमेकांच्या पाठीशी उभा राहिला. या संकटातही संघ स्वयंसेवकांनी समाजहितासाठी काम केले,’’ असे प्रतिपादन राष्ट्रीय स्वयंसेवक संघाचे उत्तर जिल्हा सहकार्यवाह योगेश कुमावत यांनी केले.

राहुरी येथे काल (बुधवारी) शहरात स्वयंसेवकांनी पथसंचलन केले. नागरिकांनी पुष्पवृष्टी करून त्यांचे स्वागत केले. त्यानंतर झालेल्या कार्यक्रमात कुमावत बोलत होते. प्राचार्य जगदीश मुसमाडे यांची प्रमुख उपस्थिती होती. कुमावत म्हणाले, की भारतावर अनेक आक्रमणे झाली, परंतु देशाभिमानी राष्ट्रपुरुषांनी ती परतवून समाजाला संकटातून बाहेर काढले. संकटात दुसऱ्याला मदतीची शक्ती तयार झाल्याने, कोरोना संकटात देशात, परदेशांत आपण मदत केली.

प्रा. मुसमाडे यांनीही मनोगत व्यक्त केले. यावेळी संघ स्वयंसेवकांनी सूर्यनमस्कार व विविध खेळांची प्रात्यक्षिके सादर केली.

-------------------------------------------------------------------------