संगमनेर (अहमदनगर) : शहर आणि तालुक्‍यातील कोरोनाबाधितांची वाढती संख्या लक्षात घेऊन संगमनेरच्या कृषी उत्पन्न बाजार समिती आवारात होणारी गर्दी टाळण्यासाठी, बाजार समितीने सुरक्षेच्या उपाययोजनांचा अवलंब सुरू केला आहे. गर्दीमुळे होणारा कोरोना प्रादुर्भाव टाळण्यासाठी प्रवेशद्वारावर वाहनांचे निर्जंतुकीकरण, वाहनचालकासह फक्त एका शेतकऱ्याला प्रवेश आदी उपाययोजना करण्यात येणार असल्याची माहिती सभापती शंकर खेमनर व सचिव सतीश गुंजाळ यांनी दिली.

कोविडच्या दुसऱ्या प्रभावी लाटेने राज्यात थैमान घातले आहे. कोरोनाबाधितांची संख्या झपाट्याने वाढत आहे. शेतकरी मोठ्या प्रमाणात कांदा, टोमॅटो, डाळिंब यांसह फळे व पालेभाज्या बाजार समितीत आणतात. यादरम्यान शेतकरी, व्यापारी, हमाल, मापाडी यांची मोठी गर्दी होते. गर्दी नियंत्रणात आणण्यासाठी व्यवस्थापनाने बाजार समितीतील सर्वच घटकांना खबरदारी घेऊन कठोर पावले उचलण्याच्या सूचना केल्या आहेत. मास्कशिवाय कोणालाही आत प्रवेश दिला जात नाही. लहान मुले, वयोवृद्धांना प्रवेशबंदी करण्यात आली असून, या निर्बंधाचे पालन करण्याचे आवाहन बाजार समिती व्यवस्थापनाने केले आहे.