अहमदनगर : जिल्ह्यातील कारखान्यांना या वर्षी गळीत हंगामासाठी पुरेसा ऊस उपलब्ध झाला आहे. मागील वर्षी जिल्ह्यात एक लाख 30 हजार 805 हेक्टरवर ऊसलागवड झाल्याची कारखान्यांकडे नोंद आहे. याव्यतिरिक्त काही क्षेत्र उसाचे आहे. त्यामुळे या वर्षी सुरू राहणाऱ्या 22 कारखान्यांना उसाची टंचाई भासणार नाही. उलट, कारखान्यांकडे ऑगस्टपर्यंत तब्बल 6 लाख 4 हजार 124.60 टन साखर शिल्लक आहे.या वर्षी जिल्ह्यातील 23 पैकी 22 कारखान्यांचे गाळप होणार आहे. यापूर्वी अनेकदा ऊस शिल्लक नसल्याने गाळप पूर्ण होत नसे.

दोन वर्षांपासून पावसाचे प्रमाण चांगले असल्याने ऊस मोठ्या प्रमाणात पिकविला जात आहे. गेल्या काही वर्षांपासून साखरेला चांगला भाव मिळत नाही. त्यामुळे कारखाने अडचणीत आहेत. त्यामुळे कारखान्यांनी साखरेबरोबरच इथेनॉलची निर्मिती करावी, असे सरकारचे आदेश आहेत. त्यासाठी आवश्यक त्या योजनाही सुरू करण्यात आल्या. काही कारखान्यांनी इथेनॉल तयार करण्याचे प्रकल्प सुरू केले. आता ऊस जास्त असल्याने कारखान्यांना उसाची अडचण नाही, परंतु जास्त ऊस होणार आहे. नोंदणी नसलेला ऊस कोणत्या कारखान्यास द्यायचा, असा प्रश्नही काही शेतकऱ्यांना पडणार आहे.

जिल्ह्यातील साखर कारखान्यास या वर्षी उसाची उपलब्धता भरपूर आहे. त्यामुळे गाळप पूर्ण क्षमतेने होऊ शकते. बहुतेक कारखान्यांनी गाळपाची तयारी केली आहे. तसे परवाने घेतले जात आहेत. त्यामुळे साखरेचे उत्पादनही भरपूर होणार आहे. साखरनिर्मितीबरोबरच इथेनॉलनिर्मितीसाठी कारखाने सरसावले आहेत.

- मिलिंद भालेराव, प्रादेशिक सहसंचालक (साखर)

जिल्ह्यात मागील दोन वर्षांपासून चांगला पाऊस झाल्याने पाणीपातळीही वाढत आहे. उसाचे उत्पादनही मोठ्या प्रमाणात होत आहे. कारखान्यांनी नोंदणी केलेल्या उसाबरोबरच इतर क्षेत्रावरही उसाची लागवड झालेली आहे.

- शिवाजी जगताप, जिल्हा अधीक्षक कृषी अधिकारी