कर्जत : तालुक्‍यातील कोरेगाव व शिंदे येथे अनुसूचित जाती-जमाती अत्याचार प्रतिबंधक कायद्यान्वये (ऍट्रॉसिटी) दोन गुन्हे दाखल झाले. यातील आरोपींना अद्याप अटक करण्यात आलेली नाही. 

तालुक्‍यातील कोरेगाव येथे रस्त्याने जाताना वाहनाला साइड मागितल्याच्या कारणावरून एका जणाविरोधात गुन्हा दाखल करण्यात आला आहे. कोरेगावजवळील मुरकुटवाडी येथील रहिवासी राहुल आजीनाथ सूळ यांनी दिलेल्या फिर्यादीचा आशय असा ः राहुल सूळ व त्यांची पत्नी गलांडवाडी फाटा येथून घरी जात असताना रस्त्यावर दादा नवनाथ मुरकुटे एका ट्रॅक्‍टरचालकासोबत रस्त्यावर गाडी उभी करून गप्पा मारत होते.

सूळ यांनी मुरकुटे यांना गाडी बाजूला घेऊन रस्त्यावरून जाण्यासाठी जागा देण्यास सांगितले; परंतु त्यांनी जागा दिली नाही. काही वेळाने आरोपी मुरकुटे फिर्यादी सूळ यांच्या घरी गेले आणि जातिवाचक शिवीगाळ केली. लाकडाने फिर्यादीला मारहाण केली व त्याच्या पत्नीला लाथ मारून ढकलून दिले, जिवे मारण्याची धमकी दिली.

हेही वाचा - नवरी अकराची, नवरा पंचवीशीतील, बापाचे कृत्य, आईची तक्रार

मुरकुटे यांच्याविरोधात गुन्हा दाखल झाला आहे. तालुक्‍यातील शिंदे येथे शाळेतील मुलीला त्रास देण्याच्या कारणावरून वाद झाला. फिर्यादी रामदास मुकिंदा भवाळ यांनी दिलेल्या फिर्यादीचा आशय असा ः माझी नात शिंदे येथे एका विद्यालयात शिक्षण घेत आहे. तिला राहुल दत्तात्रय घालमे त्रास देत असे.

या बाबत समजावून सांगितले. मात्र, नंतर भवाळ शिंदे गावातील विठ्ठल मंदिराच्या कट्ट्यावर बसले असताना आरोपी राहुल घालमे व किरण घालमे तेथे गेले. "तू इथं का बसलास? तुझी किती पोरं आहेत, ती घेऊन ये, बघतोच,' असे म्हणत जातिवाचक शिवीगाळ केली आणि लाथाबुक्‍क्‍यांनी मारहाण केली. तसेच पत्नीला शिवीगाळ केली. यावरून गुन्हा दाखल करण्यात आला आहे.