शिर्डी - दोन महिन्यांपूर्वी नागपूर ते शिर्डी हा समृध्दी महामार्गापाठोपाठ आज मुंबई ते शिर्डी वंदे भारत एक्स्प्रेस रेल्वेचा प्रारंभ पंतप्रधान नरेंद्र मोदी यांच्या हस्ते करण्यात आला. साईंच्या शिर्डीच्या धार्मिक पर्यटनास या दोन्ही सुविधांमुळे चालना मिळू शकेल. समृध्दी महामार्गामुळे शिर्डीत भाविकांची गर्दी वाढली आहे. आता वंदे भारत एक्स्प्रेसमुळे त्यात आणखी भर पडणार आहे. एका अर्थाने शिर्डीच्या विकासात महत्वाची भुमिका बजावणारे या दोन महत्वाच्या भेटी शिर्डीकरांना मिळाल्या आहेत.

ताशी एकशे तीस किलोमीटर वेगाने धावू शकणारी आणि संपूर्ण भारतीय बनावटीची वंदे भारत एक्स्प्रेस रेल्वेला सोळा डबे आहेत. एकाचवेळी अकराशे प्रवासी प्रवास करू शकतील. वायफाय सुविधा, वेग आणि पुढील स्थानकाची माहीती प्रवाशांना समोर दिसेल. मुंबई ते शिर्डी हे अंतर अवघ्या पाच तासात पूर्ण करेल. मुंबई येथून मोठ्या संख्येने येणाऱ्या साईभक्तांना ही वरदान ठरेल.

सध्या मुंबई, इगतपूरी, नाशिक आणि शिर्डी असे थांबे असले तरी भविष्यात आणखी थांबे दिले जाण्याची शक्यता आहे. दोन महिन्यापूर्वी मोदींच्या हस्ते नागपूर ते शिर्डी या जलदगती महामार्गाचे उदघाटन झाले. या महामार्गामुळे शिर्डीत येणाऱ्या भाविकांच्या संख्येत लक्षणीय भर पडली. कोविडचे मळभ दूर झाल्यानंतर येथील भाविकांची गर्दी टिकून आहे.

त्यात या समृध्दी महामार्गामुळे भर पडल्याचे निरीक्षण येथील व्यावसायिकांनी नोंदविले आहे. शिर्डी ते मुंबई हा दुसरा टप्पा पूर्ण झाला की या गर्दीत आणखी वाढ होईल. शिर्डीच्या विकासाला चालना देणाऱ्या दोन महत्वाच्या सुविधांचे लोकार्पण गेल्या दोन महिन्यात मोदींच्या हस्ते करण्यात आले.

शिर्डीच्या धार्मिक पर्यटनाला चालना देण्याच्या दृष्टीने पंतप्रधान नरेंद्र मोदी यांनी आज वंदे भारत एक्स्प्रेसचे अनोख गिफ्ट दिले आहे. शिर्डी विधानसभा मतदार संघाचा लोकप्रतिनीधी या नात्याने मी पंतप्रधानांचे आभार मानतो.

- राधाकृष्ण विखे, महसूल मंत्री

पंतप्रधान नरेंद्र मोदी यांच्या पुढाकारातून मेक इन इंडीयाचे स्वप्न साकार झाले. संपूर्ण भारतीय बनावटीची वंदे भारत एक्स्प्रेस रेल्वेगाडी मुंबई ते शिर्डी या रेल्वेमार्गावर धावू लागली. हिंदू ह्रदय सम्राट बाळासाहेब ठाकरे समृध्दी महामार्गा पाठोपाठ वंदे भारत एक्स्प्रेस हि शिर्डीच्या प्रगतीत भर घालणारी ठरणार आहे.

- सदाशिव लोखंडे, खासदार