शिर्डी : नगर जिल्ह्यात काँग्रेसचे प्रदेशाध्यक्ष तथा महसूलमंत्री बाळासाहेब थोरात व भाजपातील आमदार राधाकृष्ण विखे पाटील यांच्यातील राजकीय भाऊबंदकी उफाळूुन आली आहे. हे दोघेही एकाच पक्षात असतानाही त्यांच्यात सुंदोपसुंदी चालायची. आता तर ते एकमेकांवर कुरघोडी करण्याची एकही  संधी सोडत नाहीत. आज विखे पाटील यांनी मंत्री थोरात यांच्यावर जहरी टीका केली.

राज्य सरकारमध्ये कॉंग्रेस नेते व मंत्र्यांना कुणी विचारत नाही. कॉंग्रेसचा एवढा लाचार प्रदेशाध्यक्ष आपण पहिल्यांदा पाहत आहोत, अशी टीका आमदार राधाकृष्ण विखे पाटील यांनी पत्रकारांशी बोलताना केली. 

हेही वाचा - जिल्हा क्रीडाधिकारी प्रशासनाच्या ताब्यात

विखे पाटील म्हणाले, ""शिवसेनेचे मुखपत्र असलेल्या "सामना'तून "जुनी खाट' अशा शब्दांत कॉंग्रेसची खिल्ली उडवली. मात्र, तरीही कॉंग्रेसच्या नेत्यांना त्याचे काही वाटत नाही. सरकारात त्यांना कुणी विचारतही नाही. मात्र, तरीही आम्ही समाधानी, असे ते म्हणत असतील, तर ते एक तर विनोद करीत असावेत किंवा सत्तेसाठी लाचार झाले असावेत. त्यांच्याकडे थोडा जरी स्वाभिमान शिल्लक असेल, तर त्यांनी सत्ता सोडावी. मात्र, त्यांच्याकडून तशी अपेक्षा करता येणार नाही.''