श्रीगोंदे : कर्जत व करमाळा हद्दीत पाणी जास्त गतीने जात असले, तरी पायथ्याचे नियोजन होत नाही तोपर्यंत श्रीगोंद्याच्या हद्दीत पाणी देऊ नका, या अधिकाऱ्यांच्या आदेशाला निसर्गामुळे हरताळ फासला गेला. पारनेर व श्रीगोंद्याच्या कुकडी लाभक्षेत्रात शनिवारी (ता. 13) चांगला पाऊस झाला. वाढलेल्या पाण्यामुळे कालवा फुटण्याची शक्‍यता गृहीत धरून, शेवटी श्रीगोंद्याच्या हद्दीतही आवर्तनाचे पाणी सुरू करावे लागले. 

"कुकडी'चे आवर्तन सुरू करते वेळी श्रीगोंद्यातील बेकायदा पाइप काढण्याची मोहीम झाली. त्यानंतर कर्जत-करमाळा होईपर्यंत श्रीगोंद्याच्या हद्दीत अजिबात पाणी घेऊ नये, अशी सक्त तोंडी सूचना वरिष्ठांनी स्थानिक अधिकाऱ्यांना केली. लेखी पत्रही दिल्याचे समजते. मात्र, पहिले चार दिवस पारनेर व पुणे जिल्ह्यात बिनधास्त पाणीचोरी सुरू राहिल्याने श्रीगोंदेकरांनी संताप व्यक्त केला. 

हेही वाचा - कर्जत तालुक्यात पावसाचा धुमधडाका

"सकाळ'ने हे सगळे आकडेवारीत मांडल्याने, वरच्या भागातील चोरी बंद करून बहुतेक पाणी खाली काढण्यात आले. इतिहासात पहिल्यांदाच कर्जतच्या हद्दीत 875 क्‍यूसेकने पाणी कालव्यातून वाहिले. मात्र, त्याच वेळी शनिवारी "कुकडी'च्या भागात चांगला पाऊस झाला. वाढलेल्या पाण्याचा धोका लक्षात घेऊन शेवटी पायथा ते माथा नियम बाजूला ठेवला गेला आणि श्रीगोंद्याच्या हद्दीतील वितरिका क्रमांक 132ला पाणी सोडण्यात आले. 
 

कालव्यातून पाण्याची गती चांगली मिळत असल्याने, कर्जत-करमाळ्यासोबतच श्रीगोंद्यातील काही भागाचे आवर्तन सुरू करा, असा आदेश वरिष्ठांकडून आला. त्यामुळे शनिवारी रात्री 132 क्रमांकाच्या वितरिकेला पाणी सोडले. 
- स्वप्नील काळे, कार्यकारी अभियंता, कुकडी प्रकल्प