नगर ः कोरोना रुग्णांवर रेमडेसीव्हिर इंजेक्‍शन आणि ऑक्‍सिजन या दोन गोष्टीची उपचारात महत्वपूर्ण भूमिका आहे. नगरमध्ये अहमदनगर इंडस्ट्रियल गॅसेस प्रा. लि. या कंपनीतर्फे ऑक्‍सिजन सिलेंडरची निर्मिती होते. कंपनीचे विलास लोढा यांनी रोज 500 ते 600 सिलेंडर कोरोना बाधितांसाठी उपलब्ध करुन देणार असल्याचे सांगितले. युवक कॉंग्रेसचे जिल्हा उपाध्यक्ष मोसिम शेख यांनी या उपक्रमात सहभाग घेतला.

औषध कंपनीची संख्या मर्यादित असली तरी ऑक्‍सिजन सिलेंडर हे स्थानिक पातळीवर उपलब्ध होऊ शकतात. औद्योगिक क्षेत्राबरोबरच हॉस्पिटलसाठी या ऑक्‍सिजन सिलेंडरचा उपयोग होत असतो. सध्याच्या वाढत्या प्रादुर्भावामुळे रुग्णांना ऑक्‍सिजनची अधिक आवश्‍यकता आहे. प्रशासनाच्या सहकार्याने आवश्‍यक असणाऱ्या रुग्णांलयासाठी ती उपलब्ध करुन दिली जातील.

मोसिम शेख म्हणाले, कंपनीतर्फे औद्योगिक वापराबरोबर हॉस्पिटलसाठी ऑक्‍सिजन सिलेंडरची निर्मिती करण्यात येत आहे. सिलेंडरचा तुटवडा जाणवत आहे. सिलेंडरसाठी विशेष यंत्रणा उभारली आहे. त्या माध्यमातून रोज 500 ते 600 सिलेंडर उपलब्ध करुन देणार आहेत. हॉस्पिटल बरोबरच औद्योगिक चक्रही सुरु राहिले पाहिजेत, परंतु सध्या नागरिकांचे प्राण महत्वाचे असून, त्यास प्राधान्य दिले जाईल, असेही त्यांनी सांगितले.