वाडेगाव : यंदा बाळापूर तालुक्यातील काझीखेडा एक, दोन, बहादुरा, नागद या चार वाळू घाटांचा लिलाव झाला असला, तरी सागद येथील वाळू घाटाचा लिलाव झाला नाही. काही वाळू घाट छोटे असल्याने त्याचाही लिलाव होत नाही. त्यामुळे रात्री बे रात्री अवैध वाळूची वाहतूक करून पळवापळवी सुरू असल्याचे पहावयास मिळत आहे. अशातच गुढीपाडव्याच्या दिवशी मध्यरात्री उरळ आणि पहाटे-पहाटे तामसी व बटवाडी या तीन ठिकाणी महसूल विभागाने वाळूची अवैध वाहतूक करणाऱ्या तीन वाहनांवर कारवाई करून लाखोंचा दंड ठोठावला आहे.

बाळापूर तालुक्यात यंदा दमदार पाऊस झाल्यामुळे तालुक्यातील मन, महेशा व पूर्णा नद्या भरभरून वाहत आहेत आणि सद्या नदीतील पूर ओसरताच तालुक्यात वाळू माफिया सक्रिय झाले असून, माफियांनी सर्व नियम धाब्यावर ठेवून वाळूची अवैध वाहतूक सुरू केली आहे.

तालुक्यातील अंदुरा, निंबा, नागद-सागद, लोहारा, सोनाळा, हातरुण, तामसी, बटवाडी, काळबाई शिवार या परिसरात वाळू माफियांचा सुळसुळाट सुरू झाला. मिळालेल्या माहितीनुसार शनिवारी (ता. २) मध्यरात्री एक विना नंबरच्या ट्रॅक्टर वाहनावर महसूल विभागाकडून झडती घेण्यात आली असता, त्यामध्ये एक ब्रास अवैध वाळू आढळून आली. दुसऱ्या कारवाईत वाडेगाव-तामसी रोडवर पहाटेच ट्रॅक्टर क्र. एमएच-३०-बीबी-०२०७ मध्ये एक ब्रास वाळू आढळून आली. तिसऱ्या कारवाईत बटवाडी शिवारात सकाळी एक ४०७ वाहन क्रं. एमएच-०६-जी-३८८९ या वाहनातही एक ब्रास अवैध वाळू आढळून आली. तीनही वाहनाची चौकशी केली असता, त्यांच्याजवळ वाळू करण्याचा कुठलाही परवाना आढळून आला नाही.

त्यामुळे तीनही वाहनांवर प्रत्येकी एक लाख ३२ हजार रुपयाप्रमाणे तीन लाख ९६ हजार रुपयांचा दंड ठोठावण्यात आला. ही कारवाई बाळापूर महसूल विभागातील तहसीलदार सैय्यद एहेसानोद्दीन, मंडळ अधिकारी अब्दुल अजीज अहेमद, तलाठी आर.एम.चोपडे, तलाठी आकाश वानखडे, कोतवाल नारायण घाटोळ, माधव खंडारे, रवींद्र चक्रे, तलाठी राजेश शेळके यांनी केली.