वाशीम : महाराष्ट्र शासनाने ० ते २० विद्यार्थी पटसंख्या असलेल्या शाळा बंद करण्याचा निर्णय घेतला आहे. या निर्णयाचे तीव्र पडसाद राज्यभर उमटत आहेत. वाशीम जिल्ह्यात शाळा बचाव समितीच्या माध्यमातून आंदोलनाची सुरुवात झाली आहे.

याबाबत दि. २१ ऑक्टोबर रोजी पालकमंत्री संजय राठोड हे जिल्हाधिकारी कार्यालयातील नियोजन भवन येथे आले असता त्यांची शाळा बचाव समितीच्या पदाधिकाऱ्यांनी भेट घेतली. यावेळी महाराष्ट्रातील कुठलीही शाळा बंद करण्यात येणार नाही. याबाबत मंत्रिमंडळात लवकरच आम्ही चर्चा करणार आहोत आणि सकारात्मक निर्णय घेणार आहोत. असे आश्वासन संजय राठोड यांनी शाळा बचाव समितीच्या पदाधिकाऱ्यांना दिले.

वाशीम जिल्ह्यात ज्या-ज्या गावातील शाळा बंद होणार आहेत त्या गावातील पालक आणि विद्यार्थी रस्त्यावर उतरले आहेत. जिल्ह्यात विविध आंदोलने सुरू आहेत. शाळा बचाव समितीने नुकतेच जिल्हाधिकारी कार्यालयासमोर जिल्हास्तरीय आंदोलन पुकारले आहे. वाशीम जिल्ह्यासह राज्यभरातील कुठलीही शाळा पटसंख्येच्या कारणावरून बंद करू नये, यासाठी हे आंदोलन करण्यात आले.

राज्य शासनाच्या शिक्षण व क्रीडा विभागाने २१ सप्टेंबर २०२२ रोजी एक पत्र काढून राज्यातील शून्य ते वीस विद्यार्थी पटसंख्या असणाऱ्या शाळांची माहिती मागवून त्या शाळा बंद करण्याची कार्यवाही कुठपर्यंत आहे अशी माहिती जिल्हास्तरावरून मागविली आहे. त्यामुळेच सदर शाळा बंद करण्याचा शासनाचा डाव असल्याचे दिसून येत आहे.

शासनाच्या या निर्णयाविरोधात शाळा बचाव समितीने आंदोलन हाती घेतले आहे. याच आंदोलनाचा एक भाग म्हणून आज पालकमंत्री ना. संजय राठोड यांची शिष्टमंडळाने भेट घेतली आणि निवेदन सादर केले. यावेळी ना. राठोड यांनी मी याबाबत शिक्षणमंत्री दीपक केसरकर यांच्याशी चर्चा करून सकारात्मक निर्णय घेणार असल्याचे आश्वासन दिले.

यावेळी शाळा बचाव समितीचे मार्गदर्शक रामकृष्ण कालापाड, जिल्हाध्यक्ष गजानन धामणे, जिल्हा महासचिव पी. एस. खंडारे , कोषाध्यक्ष सुरेश इंगोले , सहसचिव अजय सोनुनकर, जिल्हा कार्यकारिणी सदस्य राम पाटील डोरले, प्रा. इस्माईल पठाण, दत्तराव वानखेडे, विजयराव शिंदे व इतर पदाधिकारी उपस्थित होते.