तेल्हारा : नकली नोट प्रकरणात अटक करण्यात आलेल्या तीनही आरोपींचा जामीन अर्ज न्यायालयाने फेटाळल्याने आरोपींना आणखी कारगृहाताच राहावे लागणार आहे. १९ फेब्रुवारी रोजी न्यायालयीन कोठडी संपल्यानंतर तीनही आरोपींना पोलिसांनी न्यायालयात हजर केले असता, न्यायालयाने त्यांचा जामीन अर्ज फेटाळून लावला.

तालुक्यातील पचंगव्हाण फाटा येथे दोन चारचाकी गाड्यामध्ये आलेले चार तरुण ५०० रुपयाच्या नोटासारख्या दिसणाऱ्या भारतीय बच्चो का बँक असे लिहिलेल्या नोटा देऊन चिल्लर मागत असलेल्या आरोपींना पोलिसांनी २ फेब्रुवारी रोजी अटक केली होती. त्यांच्याकडे पोलिसांना ५०० रुपयांच्या भारतीय बच्चो का बँक असे लिहिलेले चार बंडल आढळून आले होते.

आरोपींकडून पोलिसांनी २३ लाख ९६ हजार रुपयांच्या ५०० रुपयांच्या चलनी नोटा सारख्या दिसणाऱ्या नोटा व ५४ हजार रुपयांच्या चलनी नोटा, चारचाकी वाहन क्र. एमएच-४३-एएल-७७६ अंदाजे किमत दहा लाख रुपये, क्रेटा कंपनीची चारचाकी क्र एमएच-०३-सीएस-२७४३ किंमत अंदाजे १२ लाख रुपये असा एकूण २२ लाख ५४ हजार रुपयाचा मुद्देमाल जप्त केला होता. अमित आत्माराम कटारे (वय २७ ), अमोल गोविंदा कटारे (वय २२) दोघेही रा.चिताळा ता.मानोरा जि.वाशीम, वैभव चंदू दयाळ (वय २२) रा.हिवरदरी ता.महागाव जि.यवतमाळ या तिघांना अटक करून न्यायालयात हजर केले असता, न्यायालयाने तीनही आरोपींना ५ फेब्रुवारीपर्यंत पोलिस कोठडी सुनावली होती.

कोठडी संपल्यानंतर त्यांना न्यायालयात हजर केले असता, न्यायालयाने १९ फेब्रुवारीपर्यंत न्यायालयीन कोठडी सुनावली होती. १९ फेब्रुवारी रोजी पुन्हा न्यायालयात हजर केले असता, न्यायालयाने त्यांचा जामीन अर्ज फेटाळल्याने आरोपींच्या अडचणी वाढल्या असून, तीनही आरोपींना कारगृहातच राहावे लागणार आहे.

चवथा आरोपी अद्यापही फरारच

सदर प्रकरणातील बुलडाणा जिल्ह्यातील खामगाव येथील विजय ठाकूर हा आरोपी अद्यापही फरार असून, त्याचा मोबाईल स्विच ऑफ असल्याची माहिती मिळत आहे. त्याच्या मुचक्या आवळण्यासाठी पोलिस प्रयत्न करत असल्याची माहिती पोलिसांकडून मिळाली आहे.