अकोला - मानधनाच्या प्रतीक्षेत असलेले निराधार गत तीन महिन्यांपासून मानधनासाठी बॅंक व तहसिल कार्यालयाच्या पायऱ्या झिजवत आहेत. परंतु शासनाकडून अनुदान न मिळाल्याने संबंधितांना घोर निराशेला सामोरे जावे लागत आहे. असे असतानाच शासनाने जिल्ह्यातील निराधारांना मानधन देण्यासाठी ५० कोटी ७० लाख ७३ रुपयांचे अनुदान उपलब्ध करुन दिले आहे. त्यामुळे येत्या आठवड्यात संबंधित लाभार्थ्यांच्या खात्यात सदर अनुदान जमा होण्याचा मार्ग मोकळा झाला आहे.

उतार वयात निराधारांची होणारी होरपळ थांबवण्यासाठी केंद्र सरकारने त्यांच्यासाठी संजय गांधी निराधार याेजना, श्रावणबाळ सेवा राज्य, इंदिरा गांधी राष्ट्रीय वृद्धापकाळ निवृत्ती वेतन, इंदिरा गांधी राष्ट्रीय विधवा निवृत्ती वेतन, इंदिरा गांधी राष्ट्रीय विकलांग निवृत्ती वेतन याेजना सुरू केली आहे. याेजनेचा लाभ घेणाऱ्यांना शासनामार्फत पेंशन (मानधन) देण्यात येते. अनुदानाची रकम लाभार्थ्याच्या बॅंक खात्यात डायरेक्ट बेनिफिट ट्रान्सफरद्वारे (डीबीटी) जमा करण्यात येते. या योजनेअंतर्गत जिल्ह्यातील एक लाखावर निराधारांना पेंशन (मानधन) देण्यात येते. दरम्यान संबंधित लाभार्थ्यांसाठी मानधन देण्यासाठी जिल्हा प्रशासनाकडे अनुदान नसल्याने त्यांना आर्थिक तंगीचा सामना करावा लागला. अखेर राज्य शासनाकडून जिल्ह्यासाठी ५० कोटी ७० लाख ७३ हजार रुपयांचा निधी उपलब्ध करुन देण्यात आला आहे. असे असले तरी इंदिरा गांधी निवृत्ती, विधवा व राष्ट्रीय कुटुंब योजनेच्या अनुदानाची अद्याप प्रतीक्षाच आहे.

एकत्र मिळणार अनुदान

श्रावणबाळ (एसटी) व संजय गांधी (एसटी) या दोन योजनेचे एप्रिल महिन्याचे अनुदान प्राप्त झाले आहे. उर्वरित संजय गांधी (एससी, सामान्य) व श्रावणबाळ एससी, सामान्य) यांना एप्रिल ते जून पर्यंतचे अनुदान एकत्रित मिळणार आहे. विशेष म्हणजे राज्य शासनाकडून जुलै महिन्याचे सुद्धा अनुदान जिल्हा प्रशासनाला प्राप्त झाले आहे.

अशी आहे लाभार्थ्यांची संख्या

तालुका लाभार्थी संख्या

अकोला ४२९७४

अकोट १८७७३

तेल्हारा ११९४७

पातूर ९२९२

बाळापूर १३४१३

मूर्तिजापूर १९८७६

बार्शीटाकळी ९१०१

एकूण १२५३७६