अकोला : राज्यात गत सात-आठ महिन्यांपासून कोरोना विषाणूने धुमाकूळ घातला आहे. सदर विषाणूसह आता राज्यात बर्ड फ्लूचा सुद्धा शिरकाव झाला आहे. परिणामी जिल्ह्यात खबरदारीच्या उपाययोजना राबविल्या जात आहेत.

त्याअंतर्गत आतापर्यंत जिल्ह्यात पोल्ट्री फार्म मधील ३५० पक्षांचे सिरो (नासिकाग्रातील स्त्राव) नमुने रोग अन्वेषण विभाग, औंध पुणे येथे पाठवण्यात आले.

सदर सर्व नमुन्यांचे अहवाल निगेटिव्ह आले आहेत. त्यावरुन जिल्ह्यात कुठेही बर्ड फ्ल्यू नाही, अशी माहिती जिल्हा पशुसंवर्धन उपायुक्त डॉ. बावने यांनी दिली.

शासनाच्या निर्देशानुसार पुन्हा जिल्ह्यातील १२ वेगवेगळ्या ठिकाणच्या १३० पक्षांचे नमुने तपासणीसाठी पाठविण्यात येत आहेत. त्यासाठी पशुवैद्यकांची आठ पथके तयार करण्यात आली आहेत, अशीही माहिती त्यांनी यावेळी दिली.

(संपादन - विवेक मेतकर)